我怎可能是女神👸🏻獵人🏹（第一季更新至斷更為止）: 482

我：「咁妳…畀咗啲乜嘢回應佢呀？」
Q：「我…咪唯有笑住多謝佢嘅心意囉，佢都講到咁，唔通我要趕佢走咩…」
我：「都係嘅，佢又唔係啲狗公或者盲頭烏蠅。」
Q：「嗯，加埋…之後都可能有合作機會，佢話今年贏咗冠軍，嚟緊下一年可能再參選，睇下冧唔冧到莊喎。」
我：「妳…咁快就諗住要入閣？」
Q：「未知㗎，暑假再諗囉，但如果佢真係冧莊，我諗佢都會即刻搵我嘅。」
我：「係呢，如果妳男朋友同瘟神比，妳覺得邊個好的？」
Q：「呢層…我又唔係同社長好熟…喂呀！做乜要人哋咁比喎，咁樣好港女囉，其實都各有各好嘅，點解係要分個高下啫，一啲都唔公平，戀愛嘅嘢唔係斷斤秤㗎！好睇點相處同埋有無感覺。」
我：「係係係，妳講得好有道理。」
鬼唔知感情唔同買菜咩，揸波就話鬥波大要磅下乜嘢cup啫，揀女朋友又點可以咁膚淺呢？雖然QQ對嘢都絕對唔細…但我係唔會因為覺得Carmen大啲所以好啲囉…我喺度諗緊乜…我想講嘅係，其實我好想知道，我呢條死粉腸喺佢心目中其實有無些少重量。




Q：「咁我問你喇，琴日你同晒我哋四個女神食飯，你又會覺得邊個最正吖？」
我：「呢個…問題…」我唔識答，亦唔敢答係妳。
Q：「喂呀…你攬夠我未呀？我重要換衫㗎！」
我：「Sorry…咁妳食咗晚飯未呀？」
QQ換衫已寫過N百次，請自行填充。
Q：「食咗，頭先成大班人去咗Pizza Hut慶祝。」
我：「實有人請妳啦。」
Q：「佢唔會做得咁樣衰嘅，唔驚俾人笑死咩，就算我無所謂都唔係幾好啦…啱啱所有女仔唔使錢，不過我覺得其實根本就唔輪到佢哋決定，有文書財政兩位姐姐喺度，我哋女仔點都唔使畀錢㗎喇。」
我：「原來係咁，睇怕佢哋都係魔女嚟。」
Q：「使乜講！唔好睇小香港嘅女仔呀，隨時可以食到你得返棚骨。」




我：「Queenie，妳之前又話唔會玩啦啦隊嘅，但點解…」
Q：「我係無玩呀，落場唔好搞我，我只係負責打下beat啫，呢個係瘟神意思，佢覺得可以提高士氣，我又識音樂，咪幫下佢囉。」
我：「但係，點解妳都會有啦啦隊衫？」
Q：「講起呢樣嘢就好笑，瘟神頭先返到學校俾校長照肺，審咗成十分鐘有多。」
我：「因為件衫太小布？」
Q：「呢個係其中一個原因啦，同埋佢突然轉衫，事前無人知，搞到顧問先生成頭問號，就連落場班妹都打咗個突，不過由於件衫真係好靚，所以大家都妥協咗，好在有一場good show兼贏埋咋，如果唔係瘟神佢一定會比人磢得更加甘。」
我：「但買衫唔係要claim funding同埋要先生批嘅咩？點解佢可以喺最後關頭換過另一套衫？」
Q：「講你都未必信，佢覺得沿用之前套衫有啲娘，紅色裙白衫唔夠起眼，所以佢把心一橫自己出錢喺淘寶訂咗套自己鍾意嘅，甚至為安全起見各種size嘅佢都再訂多一兩套，所以連文書財政姐姐都有，只不過佢哋死都唔肯換咋嘛。」
我：「原來…又係一個出類拔萃嘅敗家仔。」