我怎可能是女神👸🏻獵人🏹（第一季更新至斷更為止）: 490

呢張其實係電腦顯示卡，打機用嘅；我而家用緊嗰張係760，只可以掹掹緊玩到啲3D game，QQ嚟之前我都一直搵緊有無平嘅二手970或者1060，但佢嚟咗之後已經完全放棄咗換卡嘅念頭，估唔到…而家竟然有張2070喺我眼前！
爸：「其實…都唔關事，只係咁啱㗎咋…」
我：「吓！顯卡都可以有咁啱？」
如果有咁啱，女神都可以由天跌落嚟啦。
爸：「係咁嘅，前排架船經過中歐，咁啱嗰邊打擊緊啲非法礦場，起咗幾千張display卡出嚟，啲貨扣晒喺海關度，佢哋處理證物需時，揸喺手上又無乜用，咁佢哋要同啲船公司維持良好嘅互動關下，所以有十張八張就輾轉流到去我架船度。」
你話吖，呢個世界到底有幾黑暗…虛擬幣攪到QQ老竇破產走佬，而我有顯卡換原來都係因為掘礦；呢個情況實在可以叫做，我不掘虛幣，虛幣卻為我修改人生。
我：「啲郵輪…究竟係做旅遊，定係走私㗎…」
爸：「一半半啦…嗱，我未試過張卡㗎，唔肯定得唔得，如果掘礦掘壞咗唔好怪我呀。」
我：「無所謂啦，一陣換嚟試下咪知囉，反正都係不義之財，用到咪…當中奬，嘻嘻。」
爸：「你識換㗎？我唔理你㗎喇。」




我：「當然識，要玩就梗係要識。」
所以啲大人成日話我哋無嘢叻，玩就最叻。
爸：「係呢，你考試啲分又會無端端高咗嘅？」
我：「可能…我聰明咗？或者我本身其實幾叻？又或者好彩掛。」我死都唔想認我溫多咗好多書。
爸：「嗯…唔講住先喇，我早餐都未食好鬼肚餓，就落去飲茶啦，我已經幾個月未飲過茶。」
吓？！唔係咁攪我呀…咁快就…
我：「爹地…去邊度飲茶呀？」
爸：「咁都要問我嘅，梗係落去樓下搵馬神叔叔啦。」算啦…要嚟嘅係始終點都要嚟。
然後，我就換衫同爹地一齊出門口；落到去，一如以往咁攞位，嗌茶，剔點心紙…不過呢，而家啲餐牌我有份抹，啲點心紙我有份剪，同埋啲牙簽都係我加落去；幫襯返自己公司，無論點都有少少唔自在嘅感覺，好唔慣平時一齊做嘢啲姐姐攞個茶壺過嚟畀我，雖然唔係個個早更嘅姐姐都會認得我呢個收工時先會出沒嘅細路仔。
馬：「咦，你終於返嚟香港喇。」




爸：「係呀，呢兩個禮拜你都有機會見到我喇。」
馬：「咁咪幾好，好好陪下個仔啦，而家咁多客我去忙住先，一陣再過嚟搵你吹水。」
馬叔叔佢…並無講任何多餘嘅嘢。
算啦，都係由我自己開口，又唔係乜壞事。
我：「爹地，其實我而家…有返緊兼職…打工…」
爸：「嗯，我知呀。」佢一路剔點心神態自若咁同我講，似乎思考緊金錢肚定牛柏葉嘅二選一題目比佢個仔嚟得更重要。