我怎可能是女神👸🏻獵人🏹（第一季更新至斷更為止）: 499*

某喵十一種顏色中（諷刺嘅唔係covid），停筆燒緊存稿…

Q：「嗯，兩晚好快過啫，咪當去宿營囉。」
我：「妳嗰兩個表姐表妹…對妳無乜嘢吖嘛。」
Q：「欸…最主要係佢哋知道我今次只會去借住一段短嘅時間，所以睇唔到佢哋有嗰種厭惡嘅表情囉，對我好就一定唔會㗎喇，但會同我謦下八婆欬嘅…而家我無財無勢，佢哋睇住我咁樣可能會幾開心掛，係嘞，佢兩個之前日日食M記咁滯，抽到兩張全隊員嘅限量版閃鏡卡，咪喺我面前show畀我睇好威威咁囉。」
我：「咁妳…心靈上無受到傷害吖嘛？」
Q：「吓？！我做乜要因為張紙卡感到唔開心喎，我問你嘞，咁你對住我會唔會唔開心？」
我：「唔會嘅，我由細到大都係咁生活㗎啦，可能會有啲羨慕嘅，但唔係自己就唔係㗎啦，做自己鍾意做嘅嘢咪得囉…但係，妳以前過得咁好，驚妳適應唔到，如果係M記抽下鏡卡呢啲，都可以滿足下妳嘅，橫掂飯都係要食嘅。」
Q：「咪玩啦！為咗抽卡日日食M記？呢個唔係錢嘅問題囉，咁食法個樣隨時毀容都似，你話我個樣值幾錢吖！你講喇？我又唔係鏡粉嚟，重有呀！嗰張爛鬼閃卡市價已經跌到兩百蚊一張，咁想要咪直接買囉，做乜要難為自己狂食炸雞？」
我：「但係…妳同瘟神都食炸雞。」




Q：「哎呀，咁係一日咋嘛，都係貪佢近，同埋快，其實係幾好食嘅，但唔可以係咁食囉。」
我：「妳真係唔鍾意Mirror？」
Q：「無乜特別，不過佢哋有啲演出係幾好嘅。」
我：「咁又係，妳係女神，點會好似啲民女同埋師奶咁盲目追求偶像呢？」
Q：「唔關事囉，我只係覺得佢哋未夠出色，有好多個個樣都只係一般般啫…嗱，我問返你嘞，咁你會唔會迷Collar吖？」
我：「咪玩啦，妳見我電視都唔多開就知乜事啦，堆靚嘅，後生嘅都foul晒，剩返一堆無乜樣嘅大姐喺度都唔知做乜，淨係妳一個都贏晒佢哋啦。」
Q：「嘻嘻，多謝你讚我喎，咁你明啦，要我做鏡粉嘅話，可能要佢哋去韓國走返轉先。」
呢個女神吖，又高要求又毒舌，如果俾堆「前妻」聽到佢咁講嘅話我驚佢死無葬身之地…不過，如果堆鏡唔靚仔，咁睇怕我根本甚麼也不是了。
我：「妳…唔會咁樣同表姐妹講呀？」
Q：「唔會，我條小命重要繼續用，而且之後都有時要返去同佢哋住啦，佢哋覺得開心就好。」




我：「係呢…妳以前，對佢哋會唔會唔係幾好？」
Q：「無囉，其實交流就唔多，本身佢哋就唔鍾意我哋一家，見到我衫褲鞋襪又眼紅，咁我做乜都無用㗎啦，唔通要我專登求祈著扮窮咁見佢哋咩，咪重衰。」
係嘅，佢講得無錯，生活水平嘅鴻溝，可能比起代溝或者種族膚色嘅隔膜更加嚴重；只有一啲好極端嘅情況可以打破呢個情況，例如QQ被迫要同我住埋一齊咁。