Q:「叔叔對唔住呀,可能…係我沖得太多涼,如果…第時,有能力嘅話我一定會還返啲錢㗎。」
爸:「咁又唔使,俾得妳喺度住就唔會計較呢啲,妳當呢度自己屋企得㗎喇,最緊要妳住得舒服,係呢…都好夜喇,聽朝你兩個重要返學。」
Q:「嗯,咁叔叔…不如我而家去沖涼先…」
爸:「去啦,唔使就我哋,慢慢沖。」
講完QQ就即刻執返起個Bra Bra閃入廁所…其實又邊有得慢慢沖吖,以今日嘅氣溫同佢用開嘅水壓嚟講,我可以肯定最多只係沖到十三分鐘,因為我對佢嘅生活習性已經瞭如指掌。
QQ入咗廁所,剩返我同爹地兩個喺出面面面相覷…做乜喎,唔係諗住而家嚟鬧我呀…
爸:「你個女同學好靚女喎。」
我:「嗯,但同佢住喺度無任何關係。」
爸:「佢真係唔係你女朋友?」
我:「咪話咗唔係囉,佢都住埋喺度我重呃你嚟做乜喎…我何德何能要佢做我女朋友…真係咁啱佢坐喺我隔籬,屋企又出咗事先幫佢,你估佢貪我哋屋企高床軟枕咩,係無家可歸先屈就喺度咋。」


爸:「咁又係,如果你話係我都唔係幾信。」
我:「咁你又問我…」
爸:「係呢,佢而家生活…除咗住重有無其他問題呀?」
我:「基本上都無乜嘅,暫時叫過得去。」
爸:「因為你去咗酒樓打工?」
我:「欸…一部份啦…幫補下啦。」
爸:「你鍾意人哋?」
我:「乜…乜喎…朋友有難…咪一齊諗下辦法囉。」
爸:「傻仔。」
我:「好傻咩?」


爸:「唔係呀,好叻仔。」爸爸用手摸摸我個頭。
我:「放心啦,佢好慳,嚟咗呢度都無亂使錢。」
爸:「如果我仔仔有個靚女女朋友我都開心嘅。」
我:「哎呀,唔好亂講啦,人哋…有男朋友㗎喇。」
爸:「吓…得唔得㗎…你唔會俾佢條仔打㗎?」
我:「要打咪打囉…有乜辦法喎,鬼叫佢條仔無地方畀佢住,又唔係我捉佢女朋友喺度嘅。」
爸:「咁你哋小心啲,好好相處…係呢,你知唔知道佢媽咪而家點樣呀,做乜唔理個女嘅?」
我:「唔知呀…總之就照顧唔到佢啦,你要問就自己問Queenie。」
爸:「係咪佢兩母女都係寄住喺人哋度?」
我:「呀,唔知呀,唔知呀…」


爸:「好喇好喇,唔問你,執好咗書包未呀?」
我:「嗯,而家就去執喇。」
執下執下書包,先醒起一件好大鑊嘅嘢。
頭先老竇一入嚟,我哋三個重喺度打緊傳說,然後掉低咗部電話就無理過…輸就輸硬㗎喇,但呢個唔係重點,我同Kuromi一齊掉線先係大問題…點算好,我都唔知點解釋好喇,一動不如一靜,繼續掉低佢算,等QQ出嚟先同佢一齊度下點應付。
已有 0 人追稿