我怎可能是女神👸🏻獵人🏹（第一季更新至斷更為止）: 512

太：「好，既然你係咁好學同專心，我想問下你頭先段片究竟講咗啲乜嘢重點呢？」
拜託…本身英文已經唔多聽得明，而且悶到咁我又點會真係留意佢講乜；不過唔緊要，因為我有嘅係常識。
我：「段片呢…咪教點戴套囉，撕開包裝之後最緊要分底面，因為有潤滑劑嘅要向出面，同埋錯咗方向就會好難捲落嚟…咁戴落去就要貼住個頭，唔好整到有氣泡，慢慢捲…慢慢捲，唔可以操之過急，要有耐性咁包住晒成條性器官，咁就完成喇。」自問呢個topic我去教都問題不大。
太：「非常好呀，各位同學畀啲掌聲佢。」
「啪啪啪啪啪啪…」哎唷，我會怕醜面紅㗎。
太：「不過呢，成段片無一個字講過有潤滑劑囉，吓？！你做乜呀？專心聽書？使唔使講埋有突點同螺紋畀大家知呀？阿爽？」
我：「Sor…sorry…」死火，今次畫蛇添足添…
「哈哈哈哈哈哈哈…」
太：「各位同學唔好笑佢，冷靜返啲…嗱，我見你都真係幾略知一二，而家就畀個偉大嘅任務你去將功補過，協助下全班同學一齊學習。」
我：「咁Miss…係乜呀？」


太：「嗱，你出嚟先啦。」
先生叫到我梗係無得反抗，然後戰戰兢兢咁行出去，呢位阿太向來怪招奇多，所以都有啲擔心。
然後佢放咗一包嘢喺我個手上，我摸到未見到都知係乜啦，乜咁大整蠱呀！
我：「Mis…miss…畀呢包嘢我做乜呀？」
太：「咁都使問嘅，見你咁專業，梗係要你親身示範一次嚟畀我哋參考下啦。」
我：「唔…唔係玩咁大呀…唔掂㗎喎…」
我不其然…下意識咁縮埋個下半身。
太：「你咁驚做乜呢，放心啦…我就唔會叫你除褲嘅，你估我唔驚畀人投訴咩，何況，咁多人睇住你…實縮到成粒蠶豆咁，點戴喎…」
「哈哈哈哈哈…」將快樂建築喺別人嘅痛苦之上為之人生最樂，而我呢…就係樂極生悲。
我：「如果係咁嘅話…即係咁？」我伸咗隻手出嚟…


太：「喂喂喂，你唔好對住我舉粗口手勢呀下！」
我：「唔會嘅，中指唔啱size，起碼都要兩隻手指啦。」我將食指同中指疊埋舉起。
太：「原來你都知你自己幼。」
「哈哈哈哈哈…」
太：「唔使咁勉強喇，有工具嘅，睇下。」
佢拎咗一枝大號嘅test tube出嚟，有德國腸咁粗嘅，原來係咁…我都放心啲。
不過明明我自己下面都差唔多啫。
我：「咁我係咪戴落條test tube度就得呀？」我一手攞起枝tube，一手揸住個套講。
太：「你冷靜啲先…唔好打爛嘢呀，呢枝嘢好貴㗎，成七十幾蚊枝。」
我：「哦，放心啦，我會放好條嘢先撕包裝嘅。」


太：「不過得你一個做示範好似有啲悶，我想搵多個同學出嚟一齊參與，有無女同學自願呀？」
唉…又搞乜呀，呢啲馬騮戲玩我咪算囉，何苦要其他女同學難做呢，雖然我係無乜所謂…
當然…全場鴉雀無聲都可以話係情理之中，意料之內。
太：「邊個出嚟示範嘅話我會畀多一分平時分…嗯…好似都係無人肯呢，咁不如阿爽你就揀位女同學出嚟同你合作，將呢一分送畀佢啦。」
屌，玩咩…你玩啲女同學定玩我呀？！