我怎可能是女神👸🏻獵人🏹（第一季更新至斷更為止）: 516

不過講真吖，經過今次嘅性教育堂，我個腦海有時就會浮現出佢幫男朋友戴套嘅場面，雖然有時佢會講到好似不情不願咁，但我就覺得佢骨子裡都係會主動嘅，起碼佢平時深夜謦情慾電話都一定係貨真價實，唔會係只係扮聲。
話咁快就到咗放學嘅時間。
我：「爹地，我返嚟喇。」
而佢，竟然喺度玩緊模擬貨櫃車。
爸：「仔仔返嚟嗱？真係夠晒準時。」
我：「點會唔準時喎，學校喺樓下咋嘛，行上嚟咪係囉。」
爸：「唔係，我係指以前就算我喺度嗰陣，你都鍾意喺球場踢波或者喺中心hea到夜一夜先返嚟，差唔多我唔落去捉你都唔返上嚟食飯咁。」
我：「咁…中三…要勤力啲讀書吖嘛。」
於是我索性校服都唔換，就喺書包攞啲功課出嚟做，其實我本意就唔係為咗扮乖嘅，只係唔想老竇不停咁問長問短。
爸：「係呢，Queenie會幾時返嚟？」




我：「呢層…我唔知喎，不過佢今日應該無約，過一陣就會返嚟㗎喇。」
爸：「乜你哋無溝通㗎咩？」
我：「吓，佢又唔係我嘅邊個…我唔會理佢咁多㗎喎，況且我哋又絕對唔會一齊返屋企嘅。」
爸：「咁又係。」問完嘢佢就繼續打機。
其實我何嘗唔係每日一返嚟就喺度等佢返屋企吖，每日都想快啲見到佢，聽到佢話要同啲姐妹去行街就最唔開胃，除咗有排等之外重要凝住佢又要使好多無謂錢…不過呢，咁佢都要有朋友嘅，呢個係好無可奈何嘅事嚟。
點知…今日等咗成半個鐘都未返到嚟，我打開咗本數學練習簿，計完兩條level one嘅低B數之後就郁都無郁過，成個腦喺度諗緊QQ到底幾時返屋企。
「咔嚓。」
我：「Queenie妳返嚟喇？」
Q：「嘿…呼…好鬼重！」
爸：「Queenie妳好…」




呢種感覺實在係夠晒奇怪，唔知爹地佢會點諗嘅呢？當多咗個女喺屋企？如果有一日爹地搵到女朋友，屋企又再多另外一個女人，我真係唔敢想像到時會變成點…如果爹地要同嗰位auntie瞓…咁我咪迫住要同QQ迫喺一張單人床…