我怎可能是女神👸🏻獵人🏹（第一季更新至斷更為止）: 524

健：「點呀，部電話爆炸未？」
我：「未嘅，無乜電，有啲㷫咁。」
健：「使唔使…借啲錢畀你買住部新機先？」
我：「唔使嘅…如果要買，我其實都有錢。」
健：「係喎，差啲唔記得你而家係在職人士。」
我：「我諗未使買住嘅，我而家backup啲嘢，原廠重設一次，應該可以捱多一年。」
健：「咪搞住先啦，謦多陣得唔得呀？」
我：「有乜好謦呀，得9%電。」
健：「差住嚟謦咪得囉。」
我：「咁樣我真係驚會著火爆炸喎。」




健：「咁你真係要買過部新機哩。」
我：「打嚟我屋企號碼啦。」
然後轉個頭我就換咗個電話。
我：「有乜貴幹呀…」
健：「你覺得呢，Kuromi佢有無分別呀？」
屌，原來又搵我當心事台嚟搵笨，不過算啦，係我掉線唔啱在先，就聽下佢寂寞的心夜夜叫乜春都好，而我老竇就時不時會望過嚟睇我同男仔煲粥，過咗陣Kuromi就洗完白白上床唔鬼理我。
應酬完啲麻煩人之後，爹地望一望QQ個喼，然後走過嚟細細聲同我講嘢。
爸：「Queenie屋企之前係咪好有錢㗎？」
我：「應該就係，但佢嚟咗之後都無乜特別，我哋都係好平常咁生活。」
爸：「嗯，總之你哋好好相處啦，我唔喺度嗰陣你哋要自律呀，有乜緊要事就同我講，或者搵婆婆舅父佢哋，始終有啲嘢要大人先處理到，唔係你哋可以話晒事。」




我：「嗯，最緊要我哋乖乖返學嘅啫。」
聽日重要返學返工，所以我都好快沖涼上床瞓。
星期五，學校無乜特別嘢發生，上堂嘅嘢就唔講咁多喇，雖然知道你哋無得返學校玩好唔開心，但呢個唔關我嘅事。教書係老師嘅責任嚟，我都唔好意思勞煩作者寫咁多學術嘢。
放學返到嚟屋企，QQ一如往常咁即刻開枱做周末嘅大量功課，而我為咗扮乖同效率問題都會同佢一齊做；老竇為咗唔好阻住我哋，就上返床坐喺度㩒下電話，睇下雜誌，過下日晨。
我：「係呢，妳呢兩個禮拜，成日同男朋友講唔到電話，使唔使解釋㗎？」
Q：「唔算吖，星期二先煲完粥，講唔到電話嘅日子咪send message囉，同佢講阿媽昅得我緊就得，佢都會明，而且唔想惹麻煩嘅佢驚過我啦。」
我：「原來係咁…確實被妳玩弄係股掌之中。」
Q：「乜喎，我星期六日都有搵佢，益晒佢啦。」
我：「咁有無…乜嘢呀？」