我怎可能是女神👸🏻獵人🏹（第一季更新至斷更為止）: 526

我就唔明好解啲嘅logic係乜，不過佢話點咪點囉，最緊要佢OK，我就即刻洗面先。
我：「爹地，好快！等埋我！」
然後我哋三個一齊落樓，周末嘅朝頭早人煙稀疏，今日天朗氣清空氣好好，望到遠處嘅山巒起伏，金色嘅霞光將我沉重嘅眼皮撬開，迫迫我迎嚟新嘅一日。
朝頭早嘅酒樓無馬叔叔喺度，當然啦，如果朝七晚十二就鐵人都頂唔順，所以早午更係會有第二個經理喺度，不過我就唔識佢老鼠喇。
姨：「交叉仔你咁早嚟飲早茶嘅，有無瞓過㗎？」
我：「有…梗係有啦…」
姨：「幫我整籠叉燒包先，啱啱蒸起㗎咋，無呃你！」所以話呢…幫襯自己公司真係好麻煩。
姨：「呢位妹妹咁靚嘅，你細妹嚟㗎？」
Q：「早晨呀，姨姨，我唔係佢細妹嚟㗎，我係佢同學，一陣學校有活動，咪順便一齊食埋早餐先。」
姨：「哦，原來係咁。」然後笑咪咪走咗。




老竇食老餅專用嘅窩蛋牛肉飯，我就食皮蛋瘦加鮮竹卷，QQ就當然係蝦餃…重有叉燒包，再加碟牛肉腸一齊share。
呢個鐘數，全場都係啲阿公阿婆嚟，不過唔好睇少佢哋，嘈到拆天咁，揦起份報紙就可以開巷。
唔知…當我同QQ到咗呢個年紀，重有無機會一齊嚟飲早茶呢？我哋會係乜嘢關係？不過就算無論我哋係乜關係都可以飲茶嘅，只係驚到時我已經無敢搵佢嘅膽量，唔知…到時我哋又係咪都喺香港呢？如果為咗飲餐茶搭飛機咁都幾浪漫吖。
爸：「好喇，唔使送我去搭車，你兩個返上去瞓啦。」佢孭住個旅行包，準備繼續佢嘅飄泊工作。
Q：「叔叔，咁我哋下次再見喇。」
爸：「嗯，下次見啦，Queenie，又或者，希望妳屋企可以搞返掂等妳可以返去。」
Q：「哈哈…希望啦，雖然我覺得機會不大。」
爸：「點都好啦，你兩個要互相照顧，知唔知？」
我：「知道喇，爹地，等你下次返嚟喇。」
爸：「係咁先！Bye bye！」他揮一揮衣袖，就離開了，慢慢消失喺我哋兩個小朋友嘅眼前。




Q：「你爹地咁就走咗。」
我：「做乜呀？咁快就掛住佢呀？唔想做獨留自家嘅小朋友？」