我:「唔係呀!因為比起平時多咗一千呀!」
Q:「吓!點解會咁嘅?」
我:「我諗…一定係爹地支持我助養女神!」
Q:「喂呀,係咪真㗎,定係畀你交乜費物費咋?」
我:「唔會呀,平時要交錢我會直接同佢講,每個月都係一樣嘅,所以肯定係打本畀我包養妳。」
Q:「邊個俾你包養我喎!我無講過呀!」
我:「講笑啫…總之妳嘅生活,我會負責。」
Q:「唔使呀…第時,到我搵到錢,我一定會還返畀你㗎。」
我:「哎呀,計較呢啲嚟做乜喎,第時先算啦…總之,以後每日就多三十幾蚊使,妳啲伙食可以食好啲,同Yvonne佢哋食唔使就住就住。」
Q:「唔會囉…我一定會好慳。」


我:「加埋我份人工,都夠妳正常生活㗎喇,唔使太擔心,以後可以過得好啲。」
Q:「重講!你夠鐘返工㗎喇,係咪想遲到呀?」
我:「嘻嘻,我知呀,先唔會遲到囉,bye bye!」
Q:「嗯,等你放工返嚟。」
我:「唔使等我啦,妳聽日唔係又要去拍拖咩?」
Q:「我下晝先去呀,唔使咁早瞓。」
我:「妳鍾意啦,行先喇…」
※※※※※
點算…每次睇住佢返工,我欠佢越嚟越多。
雖然…個傻仔每次返工都好似好開心咁,我諗佢唔會太辛苦嘅;但係,我又憑乜要佢養我喎,我同佢其實乜都唔係,就算我男朋友每個月都無使咁多錢喺我身上面…唉,如果我得自己一個人,都話可以還返嗰啲嘢畀佢,但我有仔…佢一定唔鍾意…我都唔想對唔住男朋友。


Queenie…呀Queenie,點解妳咁無用㗎,而家搞到好似學咗妳阿媽咁…雖然呀女遺傳阿媽好正常;點解我男朋友唔可以再有錢啲,租埋間屋包起我喎,如果可以…我就算日日畀佢乜嘢…都OK。
其實我有無嘢可以做到呢?除咗嗰啲嘢之外,雖然幾十蚊一條底褲畀人望下摸下就可以變成千蚊,但係我應承咗交叉仔…都唔明,我淪落到咁,點解重要咁堅持,我自己都接受到啦,由得我咪算囉,係要自己咁辛苦去返工搵錢…
補習網…出post嘅最少都有中五…
Freelance翻譯…要有DSE成績…
教琴…教小學生都要求有七級證書…
其他正常公司嘅,根本諗都唔使諗…
就算要我企快餐店賣包,我寧願去賣底褲…賣埋自己心口大包都得,賺啲變態佬一大筆…其實比起收最低工資,分分鐘嚟得更有尊嚴。
第時…我可以點還畀交叉仔…如果有朝一日我分咗手…我都唔知點…唔想破壞我同佢之間嘅關係。
佢對我實在係已經太好,我唔可以用咁嘅眼光去睇佢,但係…我又有啲乜係可以畀到佢。
好亂…我都唔知自己想點…以身相許咁老套咩,好似…多數都唔會有啲乜好結果。


上網搵學生妹搵錢嘅資料,全部都係無好嘢嚟,賣身賣肉,PTGF,賣內衣褲,除衫私影,賣相賣片,酒吧party girl,假結婚…究竟,呢個乜嘢世界嚟…
轆下轆下,俾我連咗去個IG page;咦!可以諗下喎,如果係返呢啲工,都算係正常吖。
睇完又睇,個心都係十五十六,緊張到坐立不安;始終…有啲嘢我要開始面對,如果交叉仔做到,我無理由做唔到,我唔允許自己咁樣!
呀,不如…
※※※※※
已有 0 人追稿