我怎可能是女神👸🏻獵人🏹（第一季更新至斷更為止）: 552

我：「食…豆腐花？」
Q：「係呀，唔通食我豆腐咩？」
我：「但係呢個鐘數，可以去邊買豆腐花？」
Q：「咁你都好意思問我嘅，咪你最鍾意嘅七仔囉，快啲去啦！」然後佢就捉住我隻手拖咗我去。
啱啱好做特價，九個半兩包百福豆花，非常之平。
平時都唔會敢同佢兩個人一齊喺學校附近出現，只有呢個時候我哋先可以回復自由，盡情躝街。
Q：「呀，擘大口，喂你食吖。」佢遞隻羹埋嚟。
我：「嗯？我自己都有一兜。」
Q：「咁你係咪唔食呀？」
佢講到咁，我即刻擘大口。




係喎，可能佢又想迫我食佢口水尾，等我聽晒佢話，唔得次次都係咁，我要報復…
我：「呀…到我喂返妳。」
佢擘大口，含住我隻羹，吞咗啖豆腐花。
不過唔見得呢個靚女會聽我話。
佢個樣好似好滿足，用水汪汪嘅大眼睛望住我，然後煨咗個頭埋嚟我心口度，抱住咗我。
佢有啲時候失驚無神就會咁，唔知今次想點呢？
我都抱返實佢，兩個人攬埋一嚿，便利店嘅男女都喺度望住我哋，佢就話匿喺我心口度，但我個樣突咗出嚟同啲人眼望望，不過最緊要唔好有同學出現就係真嘅。
Q：「你呀，睇住你返工個樣，真係好型。」
我：「吓…有乜特別喎，都係執下枱咋嘛。」
Q：「因為睇到你好畀心機做嘢養我，覺得好幸福。」




我：「唔搵錢，邊有得畀妳開飯喎。」
好想捉佢個頭上嚟同我打茄輪，佢應該唔會反抗，但直覺話我知夾硬嚟係唔會有幸福，而且當我一諗起佢係第二個男仔條女，就無乜心情。
Q：「你成日星期六都會同班uncle玩㗎？」
我：「玩…有乜好玩喎，次次都係同佢哋捧酒。」
Q：「平時呢度無啤酒妹㗎？」
我：「呢間酒樓，新年係我唯一一次見到有啤酒妹，馬叔叔話唔關佢事，都係代理嗰邊安排。」
Q：「你覺得，我會唔會適合做啤酒妹呢？」
我：「哎吔，唔好玩啦，啤酒妹要對住好多亂七八糟嘅男人，好危險㗎，有時重要飲酒。」
Q：「但係，啲uncle可能都會惜住我㗎喎。」
我：「呢啲工同妳都唔襯，妳邊使做呢啲…」




Q：「有分嘅咩，我而家只係一個窮光蛋平民女仔，你估我重係以前咁咩…如果我做啤酒妹，或者有機會可以同你一齊返工。」
我：「做…做乜喎…點解要一齊返工…」
Q：「等我昅實你，唔好俾其他啤酒妹誘惑咗你唔養我。」佢用手指㧻我個心口。
我：「點會喎，我邊係呢啲見利忘義嘅人…唔好講喇，做啤酒妹都要夠十八歲先做得，妳重有排等，勸妳唔好咁多幻想。」其實，如果QQ著住啤酒妹裝扮，一定會好靚，同啦啦隊有得揮。