我怎可能是女神👸🏻獵人🏹（第一季更新至斷更為止）: 558

唉…男人，講就天下無敵…
「Queenie，都差唔多夠鐘，我送妳返屋企吖。」
我：「唓，嗰幾個站，送唔送都係咁，唔使喇。」
「妳唔想見多我一陣咩？呢排都唔使我送咁…」
我：「今日就真係唔使嘞，爹地媽咪出緊嚟搵我食飯，你係咪想一齊吖？」
「吓，呢度？嚟朗豪坊？」
我：「嗯，係呀，但唔知係咪喺度食。」
「咁…我係咪而家就要走喇？」
我：「做乜嘢呀？好驚見家長咩？」
「咁…又唔係嘅…但你咁細個…佢哋知道實對妳問長問短，會搞到妳好大壓力…咁我哋而家咁開心，輕輕鬆鬆咪幾好…見家長嘅嘢唔使急啦。」




我：「係喇，偷情重開心添呀，咁妳快啲走啦。」
「點會偷情呢，妳係我嘅唯一，只有妳一個…咁我落去搭地鐵先喇，妳就喺度行住街等屋企人啦。」
我：「嗯，行啦，如果唔係撞到你就有排煩。」
「好，惜多啖先！啜，bye bye喇。」
哈，咁驚見到我父母…如果俾佢哋知道我咁細個你就食咗我隻豬，出嚟行街又攪到人哋個女濕晒，唔知佢哋會點呢？我諗…你都係早走早著比較好，我都唔想妳煩，因為我自己都唔想煩。
如果我屋企好似以前咁，唔知會點呢？我媽咪應該會唔識理，又或者唔想理，佢自己都唔係好得幾多…會由得我，剩係叫我小心啲唔好攪大自己個肚？我都唔知…至於我爹地，就更加估唔到，應該會黑面，然後以讀書為由唔俾我拍拖…唉，你自己當年咪又係用錢嚟買學生妹歡心。
我屋企…真係只係睇落有錢同過得好開心，其實好多嘢都奇奇怪怪；相反，交叉仔雖然好細個就變咗單親家庭，爹地又成日唔喺香港，但係反而好似重正常少少，個傻仔又好聽媽咪話。
終於使走咗個麻煩友，我可以樂得清靜，做自己想做嘅嘢…其實對於佢，我都唔係太清楚自己係咪真係愛佢；咁女仔就梗係鍾意俾人惜㗎啦，嗰陣見佢對我幾好，個樣又唔差，讀書有返咁上下可以幫到我，家境亦都算富裕…而且唔係同學我可以煩少好多嘢，咪畀個機會佢同我一齊囉。
但年幾嚟，我唔算係好有感覺，佢亦都無做過啲乜係真正感動到我…總之咪一齊玩囉，飲飲食食，叫有個伴互相陪下咁，得閒嗰陣叫做無咁悶，可以攬攬惜惜，之後做埋愛，但其實都只不過係咁…我又唔認為做咗愛就會等於啲乜，最主要都係因為大家有需要，喺個過程得到舒服同快感啫；又或者只要一個男仔真心對我好，可能我都無乜所謂。
以男朋友嚟講佢都OK嘅，無乜問題…但就僅此而已，我都唔太知我哋嘅將來會係點。




而家我又住咗喺交叉仔度，唔知算唔算背叛佢呢？如果佢知道嘅話都可以肯定係會唔開心，但其實我又無做過啲乜，交叉仔亦都好清楚我係人哋嘅女朋友而無對我亂嚟…講真，我哋都只係好好嘅朋友啫，唔係咩？就算我少少地益下佢，都只係出於友情上嘅心意…
呀…好煩呀！總之我唔可以再欠佢哋屋企太多。
行下行下，我就嚟到我嘅目的地，西洋菜南街。