我怎可能是女神👸🏻獵人🏹（第一季更新至斷更為止）: 576

我走埋去佢張枱度放低個玻璃杯，扭開樽蓋倒咗半枝Perrier落個杯，汽泡隨即咋一聲咁浮上面。
肥：「咪走住啦，幫我㧻下塊檸檬先。」
我：「好呀，主人。」我都係一個香港人嚟，最鍾意當杯入面塊檸檬係自己個仇人，要㧻到佢啲肥油泌出嚟咁㧻…㧻完，走人。
希望佢飲埋杯嘢就會走人，唔好再妨礙我哋工作。
我：「御主人樣，請問你想嗌啲乜嘢嘢食？」
當我彎腰為其他客人落單嘅時候，我突然感覺到身後面有啲奇怪嘅觸感，發現到死肥仔佢慌失失咁望住我，左手攞住嗰枝好長嘅不銹鋼攪攪棒，十足一個偷嘢俾人發現嘅死細路咁嘅樣。
我：「你喺度做緊乜？」我鎮定咁問佢。
肥：「無…無做乜嘢…」
我：「你係咪喺度撩起我條裙？」我直接質問。
肥：「無…無呀…妳唔好屈我…」




我：「乜嘢屈你呀！你揸住枝攪攪棍重係濕㗎，夠唔夠膽驗下我條裙後面有無濕到呀？敢唔敢！可能重有檸檬蜂蜜味喺上面呀！」
我對住佢咆哮，當然係大佢啦，條女僕裙咁多花邊就算濕咗一滴都好難搵；不過佢就已經嚇到面如死灰，手騰腳震，啞口無言，低頭望住張枱。
何：「Kuromi…發生咗乜嘢事呀…」
呢個時候女僕長聽到出面嘅騷動而行咗出嚟。
肥仔見到有大人喺度，嚇到使出孫子兵法嘅最後一招，走為上著。
肥：「唔使找喇，bye bye！」
佢講完就放低一張五百蚊紙，再奪門而出，快速向後樓梯方向跑去；我行到門口位置，對住走廊大叫：「唔好以為有錢大晒呀！仆街死肥仔！」
見到枱面嗰五百蚊…我就更加火大，呢個就係輕薄我身體所付出嘅代價。
何：「Kuromi，入嚟話我知發生乜事吖。」
於是我就入咗廚房，再一五一十咁話畀女僕長聽啱啱發生咗啲乜嘢事，亦都唔需要加鹽加醋。




何：「對唔住呀，Kuromi，啱啱令妳難堪喇…」
睇到頭先死肥仔夾著尾巴逃走個樣，佢當然會相信我講嘅嘢係真啦。
何：「但係呢…唉，雖然肥仔係做錯事嘅嗰一個，但係其他客人未必知道發生乜事，佢哋只會睇到妳喺度大聲鬧人…咁樣，可能會損害我哋鋪頭嘅聲譽㗎，妳要知道，我哋呢啲餐廳靠生客係生存唔到，貪得意嘅人可能幾年先會嚟一次女僕cafe，而啲熟客，可能全港加埋都係得幾千個，佢哋口耳相傳，又或者喺討論區講閒話，都可以對我哋產生好大影響…」
我：「唔好意思呀…我知我頭先係衝動咗，一時嬲得滯就發脾氣鬧人，累到鋪頭…好對唔住。」
何：「Kuromi，妳應該第一時間搵我嚟處理吖嘛，妳重細，未必明白，唔係樣樣嘢有道理就可以放手去做㗎，好多時後果係估唔到…我唔係想妳受到委屈，講乜嘢出得嚟做就預咗要忍，俾人抽下水唔算得係啲乜嘅說話…但係呢度旺角嚟，乜人都有，每日都發生好多唔見得光嘅事，而你又唔知對方係乜人嚟，咁樣對妳嚟講係好危險㗎。」