我怎可能是女神👸🏻獵人🏹（第一季更新至斷更為止）: 578

何：「收咗佢呀，條肥仔放低咗五嚿水喺度，如果我吞咗佢就真係不義之財喇。」
我：「咁…我唯有恭敬不如從命，係呢，頭先個肥仔，係咪唔會再嚟㗎喇？」
何：「我唔知喎，好難講，不過我就認得佢嘅，佢差唔多每個禮拜都會嚟一次，如果再見到佢我會同佢講㗎喇，今日呢啲事好少事嚟啫。」
我：「係…我反應真係大得滯。」
何：「嗯，希望呢兩日體驗會對妳將來有幫助，咁妳換返衫先啦。」
從來無諗過自己會做女僕，更加估唔到我嘅女僕生捱只有短短嘅兩天；我望住鏡入面只係著住內衣嘅自己，返工…真係唔係得個樣就得，或者女僕呢個職位確實唔適合自己；換返自己衫，我將套女僕裝還返畀何小姐。
我：「何小姐，多謝妳嘅教導，我以後會繼續努力。」我向佢點頭微微彎腰鞠躬。
何：「畀心機，或者…有一天，到妳認為自己真係適合做女僕待應呢份工作，就再嚟搵我啦，如果呢間鋪到時重未執嘅話，哈哈…」
我：「何小姐唔好講笑啦，我覺得呢度營運得幾好。」
何：「妳就真係唔好講笑，做生意唔係咁簡單㗎，我開呢間鋪搵嘅錢分分鐘小過喺出面打工，如果租金加少少，隨時就會捱唔住。」




我：「咁…希望唔會啦，我重想嚟…」
何：「好喇，我要繼續做嘢，有緣再見喇。」
我：「Bye bye何小姐。」
就係咁，我開門離開咗廚房。
妹：「Kuromi，妳無事吖嘛…妳…要走嗱？」
我：「嗯，我諗呢份工作未必咁適合自己。」
妹：「對唔住呀，我頭先一時反應唔切，幫唔到妳。」雖然佢只係一個傻妹，但睇得出眼神真心不捨，講真同佢一齊做嘢幾開心。
我：「沙織，邊關妳事呢，係我本身脾氣太差…同妳雖然只係相處咗短短兩日，不過都好多謝妳嘅教導，我會記得妳。」
妹：「咁…希望妳會搵到份適合自己嘅工作啦。」
我：「嗯，我會努力，妳DSE都要畀啲心機呀。」




妹：「哈哈…我盡力啦…」
我：「好喇，我走先喇，唔阻妳做嘢，bye bye。」
就係咁，我離開咗呢棟商業大廈，可能，有生之年都未必會再嚟呢啲地方；唉，話咁快就失業，雖然我有無嘢做其實無乜影響，兼職呢少少錢唔會令我嘅生活有本質上嘅改變，而且總會有個傻仔肯義無反顧咁養我。