肥:「唔好驚我啦,我乜都唔會做,我唔會傷害妳,我係好人嚟㗎。」越講越似強姦犯,點唔驚?
我:「你而家已經令我好困擾,叫我點唔驚?」
肥:「女王…咁妳想我點,妳講乜我都會聽話㗎,我唔會違抗妳,妳唔好困擾啦。」
我:「咁你即刻同我企返起身先。」
估唔到,佢真係即刻彈返起身,而且肥腯腯嘅佢睇唔出動作都幾靈活,成隻功夫熊貓咁。
我:「同我保持一米距離。」
佢都有返啲數學常識,一米就真係一米到…
我:「擰轉面,向後行一分鐘。」
肥:「唔制。」
我:「…,係咪唔聽女王話呀,殺頭㗎!」我舉起右手擺出一個手刀嘅姿勢,作狀要劈落佢條頸度。


肥:「微臣罪該萬死,殺啦。」救命呀,help!
我:「咪搞,整污糟我隻手。」
呢個時候轉咗綠燈,我過馬路佢又繼續跟嚟,我決定先去一個比較安全同舒服嘅地方,就係朗豪坊,起碼有起乜事上嚟我大嗌都有secure聽到。
肥:「唔好嬲啦,我真係想補償妳㗎。」
我:「唔須要,請你唔好再跟住我得唔得?再唔係我報警㗎喇。」見佢軟咗落嚟,我就大返佢。
肥:「使唔使呀…都話我唔會對妳做任何嘢…」
的確又唔使嘅,何小姐講得無錯,其實佢都係一個小朋友嚟,而且報起警上嚟我隨時會俾差人托管,咁就要勞煩我媽咪嚟接我,對我嚟講都絕對唔係一件樂意見到嘅事嚟。
我:「咁既然乜都唔做,做乜又要跟住我?」
肥:「我想妳唔好嬲我,同埋補償返妳損失。」
我:「我唔會再喺嗰度返工,亦唔再係女僕,其實我唔識你,我點樣同你完全無關。」


我唔鬼理佢,搭扶手電梯繼續向上行,lobby呢度實在係太多人,分分鐘撞到熟人都唔出奇,唔想俾其他人睇到啲奇怪嘢,都係上去先安全啲。
當然隻跟尾狗就死都唔肯走,不過佢有聽話保持約一米距離,同我隔咗兩級;我向後望一望,佢無乜礙眼嘅舉動,今日我條裙唔算太短,應該都安全嘅,況且,我入面係有打底褲。
上到去,轉咗兩個圈,其實呢度一早就俾我行到爛晒,而如今我亦都無乜多餘錢喺度shopping;硬嘅唔得唯有用軟嘅,睇嚟要用口水戰說佢走,如果唔喺咁樣喺條街好虛耗我精神,有排都無得返屋企。
行到嚟一個凹位,我褪咗埋去,佢亦都保持相應距離企返喺度。
我:「想請教一下你,你點先會滿意,唔再喺度煩住我?」我叉住腰問佢。
肥:「你俾我補償返妳先啦。」
已有 0 人追稿