我怎可能是女神👸🏻獵人🏹（第一季更新至斷更為止）: 582

肥：「對…對唔住！係我錯，我抵死，我下流，我賤格，我抵打…」佢一路講一路用手拍自己塊面，咁多肉就應該唔痛㗎喇，但啲肥膏就俾佢打到啪啪聲響。
我：「喂…喂！唔好黐線啦，有人睇到㗎…」
肥：「咁妳打我啦，我知錯喇…妳點先肯原諒我？」
我：「無諗住原諒你，不知所謂。」
肥：「唔好呀，咁樣我不如死咗佢算！」
佢講完之後又喺度叩頭，撞到個地下礡礡聲。
我：「喂！停呀！」
肥：「唔得…妳重係嬲我…」
我：「你唔係話我係女王要聽晒我話㗎咩？我而家命令你即刻停低，同我起返身。」
我唔知呢啲叫真傻定傻唔晒，佢真係即刻起返身，個額頭紅咗一笪，加埋黐咗啲灰塵。




我：「拜託…我已經身心俱疲，俾我抖下先。」
睇嚟…我如果唔話原諒佢，佢就實會繼續煩死我；其實對於佢撩我條裙，我已經無乜好嬲，但對於佢咁樣跟住我，就煩到我想打佢。
我：「想問下…其實你中幾㗎？」
肥：「我？中三囉。」
原來…佢只係同我一樣咁大；好彩，我學校啲人無佢咁出色，如果佢係我同學實搞到我一頭煙。
雖然，學校時不時都會feel到有男仔望過嚟或者想䚎裙底，但就真係未遇過有人出手直接非禮我，可能係我哋幾個女嘅成日黐埋一齊氣場太犀利嚇到啲變態都唔敢過嚟…當然，交叉仔係唔計嘅。
肥：「呀，對唔住，我都重未正式自我介紹，呢張係我嘅卡片…」吓？中三細路會有卡片？
我姑且攞起佢張卡片嚟一睇…香港女僕研究所暨後援會，永遠榮譽會長，Anson To…下面重有一大堆聯絡方法，包括電話，email，WhatsApp，Line，WeChat，TG，IG，Facebook page…話雖超級無厘頭，但張卡片係正式印刷嘅。
我：「乜…真係有呢個會㗎？」
肥：「有㗎，唔信嘅話妳去Facebook度search囉。」佢個樣有返啲神氣。




我：「個會有幾多人呀？」
肥：「四個囉，不過有兩個失蹤咗好耐。」
其實…我唔應該同佢認真，呢啲小朋友攞嚟玩嘅自稱會員卡片，有錢就可以亂咁印。
我：「女僕後援會？我覺得你似係得罪女僕多啲喎。」連沙織呢啲傻妹都咁厭惡佢，呢點我係可以肯定；至於女僕研究，睇怕就係研究我哋有無打底，三圍係幾多…
肥：「我錯囉…」
我：「平時啲女僕都唔鍾意你㗎啦，做乜又咁在意我嬲唔嬲你呢？你去搵其他女僕道歉好過啦。」
肥：「唔同㗎！因為…我從來都未見過啲好似妳咁嘅女僕，妳唔係MK妹，唔係低B妹，唔係老泥妹，妳唔使濃妝豔抹都咁靚女，妳…係女神！我估唔到有女神會做女僕！」
妖…雖然佢係傻得好勻洵，但呢幾句又真係啱聽喎；死喇死喇，Queenie，妳要冷靜啲呀，妳已經唔再係女神嚟㗎喇，唔好沾沾自喜。
呀，突然之間諗起一樣嘢，都係處理咗佢穩陣啲。
我：「喂，你咁想我唔嬲，畀樣嘢嚟先。」




肥：「係，請問妳要乜嘢呀？女王。」
我：「攞頭先同我影嗰張相出嚟。」
於是乎佢喺個袋入面攞咗張相出嚟畀我，我望咗一眼，然後喺佢面前撕開四塊…原來，呢啲相紙都幾難搣下，扯到我手指都痛埋。