係幾平易近人嘅,同啲女神可以話係涇渭分明。
捱到咁上下,又差唔多到放飯嘅時間。
W:「喂,想唔想…一齊去食飯?」
我:「就我哋兩個?」
W:「係掛。」真係夠晒模稜兩可。
我:「妳想約我去食lunch?」
W:「乜呀,使唔使講到咁喎,我見第一日同你坐,咪順便問你一唔一齊食囉,你唔想就算。」
我:「我無所謂呀,但妳唔使陪其他女同學?」
當然,佢都有玩開嗰堆,總之唔係QQ。
W:「一日半日啫,咁你諗下陣間食乜啦。」


我:「我平時都係去快餐店食學生餐㗎咋,妳啱唔啱吖?」
W:「可以呀,無問題,咁行啦。」
於是我向健康兩兄弟揮一揮衣袖,佢哋早就見慣不怪,就好似我開學嗰陣重係日日走去搵細蚊唔Q理佢哋咁;不過,而家我身邊嘅只係一個普通女同學,佢哋應該都唔會諗啲乜掛。
要諗咪諗囉,就算我有女都好正常不過啫。
但係唔可以咁,我係唔會為咗一己私慾而背叛QQ嘅…就算係,我都應該接受返想同我復合嘅細蚊先啦,雖然我又好想揸波。
可唔可以叫Carmen借嚟玩下解決燃眉之急先,佢都無乜所謂㗎啦,最多我請返佢食飯又點話。
行下行下,我又發覺有啲唔對路。
我:「Wendy呀…不如,都係去第二度食咯。」
因為行到中途,見到健康兩隻嘢喺我哋前面,遙望佢兩個入咗間快餐店;實屬正常不過,我哋平時就一齊成日去食,佢哋亦都無理由會因為我唔喺度而改地方;而快餐店其實唔多位,間隔亦都幾迫夾下,分分鐘要同人搭枱,一個唔好彩就會搞到佢兩隻嘢叫埋我哋一齊坐,我當然無乜所謂,但怕韻婷唔開心啫,佢煞有介事搵我食晏晝,都唔知係咪有乜嘢想同我講,梗係想搵一笪free啲嘅地方,最好身邊唔會有人偷聽到我哋講乜。
W:「嗯,無所謂呀,你話事就得。」


我:「如果大排檔呢,妳會唔會介意?」
W:「你當我係乜呀,我成日都幫襯㗎啦。」
咁又係,佢都係屋邨妹嚟啫,點會唔食平靚正嘅大排檔吖;QQ嘅話,重點就應該係佢以前屋企附近無大排檔,一班女神一齊食飯又要互相扮下嘢,事實上我覺得佢係乜都食嘅。
行多幾步就嚟到大排檔,呢個決定果然無錯,啲位闊落好多又唔使搭枱;大排檔無學生餐,不過我哋幫襯午餐有湯之餘送埋嘢飲,凍飲重唔使加錢;我叫咗個咖喱吉豬飯,而佢就係粟米汁雞絲意粉。
已有 0 人追稿