我怎可能是女神👸🏻獵人🏹（第一季更新至斷更為止）: 616

沙律即係草，加啲汁，嚴格嚟講同我喺屋企整茄汁炒三色豆差唔多，唔明點解QQ唔鍾意食青豆。
我：「其實呢…我食嘢最開心就係見到妳食得開心，所以妳都係揀返自己鍾意食嘅嘢就得。」
Q：「哦，懶得理你。」明明就心中暗喜…
QQ揮一揮手，帶來了侍應姐姐，然後點咗一份medium嘅十安士肉眼扒，半打buffalo雞翼，一碟carbonara，重有一碗洋葱湯；唔算太多亦都唔少，睇嚟佢都幾肚餓下。
其實俾佢點菜就係明智選擇嚟，我好少嚟呢啲地方食西餐，總覺得望住塊餐牌就會頭痛；一堆唔熟悉嘅文字，無咗令我覺得安心嘅咖喱牛腩飯、四寶飯、焗豬、粟米肉粒飯，唯一friend啲嘅就係肉醬意粉，但呢樣嘢去大家樂甚至乎OK便利店都有得食。
雖然唔係我埋單，但職業病發作嘅我都要計下佢嗌咗幾多錢，嗯…呢個…嗰個…四百多少少，算係so far so good喎。
過咗一陣待應姐姐送咗一籃餐包過嚟。
我：「Queenie，我哋好似無嗌餐包？」
Q：「傻瓜！送㗎，你見唔到每枱都有咩…」
又會咁好，我剩係知酒樓夜晚迫你食果碟仔花生前菜都會收你錢…我望一望個籃，入面有三個包，睇落都幾靚下，買嘅話怕且要十蚊八蚊個，其實食晒呢三個包嘅話都夠我飽咗一大半，於是我就攞咗個有提子嘅…




Q：「好肚餓咩？你食麪包個樣咁興奮…」
我：「幾好吖，唔使錢有麪包食，梗係要試下。」
麪包對我嚟講，可以係白麪包，腸仔或叉燒或雞尾或菠蘿包，漢堡包，三文治…我又有乜可能會買呢啲西式餐包嚟食；嘩，好鬼硬，咬到牙骹軟。
Q：「我哋次次都無人會食，原封不動放返喺度。」
我：「咁大嘥…起碼都攞返走吖，可以做早餐…」
硬到咁，朝早起身分分鐘無力咬開，係咪啲鬼佬鍾意打獵茹毛飲血，棚牙特別暴力嘅呢…
Q：「唉，咁以前，又點會喺餐廳打包…本來我係諗住留嚟聽日早餐㗎，但睇嚟而家唔使。」
我花盡九牛二虎之力，咬咗一大忽入口，除咗硬之外重好乾，咬開之後感受到好重麥味，重有提子乾，唔係我鍾意食嘅味，但又唔係難食。
以前細個經過街市麪包鋪撞啱有包出爐，就會用五蚊買雞尾包菠蘿包各一，熱辣辣鬆軟香噴噴甜椰椰；同而家呢個比，就好似枕頭同石頭嘅分別，好想知歐洲人係咪唔識整麪包，定我哋香港賣緊嘅其實唔可以叫做麪包？咁鬼佬嚟到香港見到呢啲包唔知會有乜感想呢…可能喺英文書bread字隔籬幅圖嘅先係真麪包，即係我口入面呢嚿…