我怎可能是女神👸🏻獵人🏹（第一季更新至斷更為止）: 629

有一個名字叫做林韻婷嘅女仔，就企正喺我後面，直瞪瞪咁望住我，表情卻係異常咁冷靜。
佢狠狠咁摑咗我一巴。
你問我痛唔痛，對以前成日打開架嘅我嚟講當然係濕濕碎，但唔知點解俾女人打，我個心好似痛到四分五裂，連個心房同心室都掉埋位。
我呆咗咁企喺度，Wendy完全無任何表示，即刻就擰轉頭瀟灑咁行開咗，左手重搦住條廁紙。
Q：「你…重話你哋無嘢…」
我：「我…真係無嘢…唔知點解…」
Q：「你唔追住佢？！」QQ焦急咁望住我。
我：「點追呀，我同佢真係無嘢…」
我唔明…佢做乜要打我，我做錯乜？
追嚟問佢做乜打我？除非係想撩佢打多鑊…


走去道歉？但我都唔知道個原因喺邊。
我剩係喺度諗，死火喇，今次終於俾人撞到我同QQ私會…雖然QQ話過佢已經準備好點文過飾非，女神靠把口就可以抹清事實。
所謂嘅隔籬邨，其實就係阿康嗰條，亦都係Wendy嗰條，點解佢要咁夜落嚟買廁紙？
咁啱用晒無得屙屎咁大鑊？今次係咪可以順便用嚟抹眼淚？但明明我就無做過任何對唔住佢嘅嘢…
Q：「無嘢？咁你兩個到底發生咗乜事？」
我：「我都唔知，一直都係好正常嘅同學，頂多咪叫朋友…但係點算呀，俾佢見到妳同我一齊…」
Q：「據我所知韻婷就唔係一個八掛嘅女仔，亦唔會周圍同人搬弄是非，加埋…我哋只係一齊嚟買嘢啫，都無身體接觸，估佢唔會周圍同人講嘅，以佢嘅地位應該唔敢講我壞話，因為分分鐘影響返佢自己…」
女仔嘅圈子真係複雜，好似好多政治鬥爭咁；但呢層我又明喎，正如我都唔會周圍同人講瘟神成隻狗公咁追Queenie，除非有實質證明啦，如果唔係啲人只會笑返我葡萄低B仔。
Q：「你係咪同人哋講嘢一時興起喺度flirt人哋呀？搞到人哋以為你想追佢…你知你㗎啦。」
吓…咁我平時又有無flirt妳？又唔見妳以為我想追妳…同妳住埋之後我都無flirt女啦；係掛。


我：「真係無呀，我好小心，正經過唔正經，因為我都唔想佢有誤會。」
Q：「咁為乜佢見到我哋一齊就要車巴你？你同佢講過啲乜係關於我㗎？」
我：「我咪話，我同妳其實無任何關係，只不過係因為一齊坐嗰陣先熟少少咋嘛。」
Q：「係咪重加咗好多壞話，例如話我貪錢咁？」
我：「少少啦…」我驚再要食多巴。
Q：「咁你又有無聲明你係單身？」
我：「有乜聲唔聲明喎，呢個係鐵一般嘅事實！」
Q：「我知佢點解打你喇，好簡單啫，係嬲你呃佢。」