我怎可能是女神👸🏻獵人🏹（第一季更新至斷更為止）: 632

我…到底喺度諗緊乜…有無女人可以救下我，可惜Carmen姐姐要考DSE，唉…點解唔早啲囉Angel姐姐電話；QQ…對唔住，思想上我都重係仆街仔。
返到去，Wendy已經喺位，我行埋去嗰陣佢當我透明咁；同女仔溝通，有三方面係好關鍵嘅，就係溝、氹、道歉，有啲女仔好易溝，但好難氹，而有啲就掉返轉；Anyway，我識㞗吹唔代表我好叻，亦唔太知Wendy係點嘅女仔。
正如Carmen所講，同我玩係好開心，亦覺得我幾得意，但我係滿足唔到佢…或者我係一件稱職嘅玩具，但我成為唔到佢嘅氧氣同水，唔係一種必需嘅存在；諗落都幾矛盾，一個算係濫嘅女仔，喺戀愛方面又可以咁哲學同玄妙。
我知道開口佢都應該唔會理我，所以就寫紙仔。
我：『Wendy，雖然唔太明妳點解嬲到要車巴我，但我都想向妳認真道歉先。』
佢望咗一眼，然後又繼續睇佢枱面本書。
我：『我唔應該呃妳，當初以為呢個係無關痛癢，係善意嘅大話，無諗過會咁樣撞到正。』
W：『哦。』佢輕描淡寫咁描咗粒字。
我：『我同Queenie嘅關係，複雜得嚟又好難解釋，但我同佢嘅關係真係唔係妳所諗咁樣嘅，佢有男朋友亦都係得一個亦唔係我，而我亦都係單身嘅，我同佢，妳可以諗成係地下朋友咁，佢唔想我同佢嘅朋友關係俾其他人知，而我都會保護佢，所以先講大話呃妳，妳都係我嘅朋友嚟，對於為咗佢而傷害到妳，我覺得好後悔，小學嗰陣自己衰低B激嬲咗妳，當時不以為然，估唔到嚟到而家可以做返朋友，其實我好感激，亦都會珍惜呢段友誼，雖然可能妳已經討厭咗我，但我都會繼續當妳係朋友。』
書到用時方恨少，寫到咁樣算係極限喇。




而佢就喺度逐行逐行咁睇。
W：「食飯先再講啦，上堂喇。」
噢，重有得同佢食飯再講，即係應該搞得掂。
我：「嗯，多謝妳。」
呢個朝早，我上堂特別專心，專心到每一粒字每一條公式都入唔到腦，但望實黑板到中午。
我：「Wendy，咁而家…」
其實我唔肯定佢所講嘅食飯先再講，係諗住同我一齊食飯謦吖，定係到lunch time同我攤牌。
W：「行啦，重坐定定咁喺度做乜？」