我怎可能是女神👸🏻獵人🏹（第一季更新至斷更為止）: 641

同佢第一次食飯喺大排檔，所以今晚我哋又嚟返呢度，同埋無咁易撞到人吖嘛…雖然，同佢俾人撞到唔係乜大問題，佢又無對像，就算有人唱我哋都無乜好驚，係QQ會惡搞返我啫。
佢點咗個金銀蛋莧菜，我就揀咗個沙爹粉絲肥牛煲，然後我見兩個餸寡寡地就愛多碗韮菜紅，咁我就當然有問過佢食唔食啦。
一路食飯都有講有笑，其實同平時返學嗰陣差唔多，不外乎講下先生同學壞話，Mirror演唱會飛炒到幾多錢，Collar首歌算唔算抄人咁。
不過嚟呢啲地方食飯有個大問題，碗白飯三四啖就食完，因為啲伙記唔會好似我平時益啲波友咁裝飯，於是我又嗌多碗飯。
W：「其實唔使嗌都得啦，我呢碗重有，我食唔晒。」佢推咗佢嗰半碗白飯畀我，放心佢有潷落碗仔食嘅，今次唔使食佢口水尾…
我：「唔緊要，再多我都食得晒。」
唔係因為同女仔食飯胃口特別好，而係沙嗲汁…
大排檔夜晚經常性都會有啤酒妹喺度嘅，今晚亦都唔例外，貼切啲嚟講應該叫啤酒姐或者啤酒姨，絕對唔會係Angel姐姐，如果唔係我一早尖叫相認咗啦，同埋嘉士伯件制服好無feel…
W：「我想問下…我哋飲唔飲得jolly sandy㗎？」
我望去雪櫃，真係有喎，重有齊三隻味。




題外話我剩係覺得檸檬味飲得落肚，另外兩隻應該係攞嚟醫感冒用嘅…
我：「得掛，我記得啲人講過佢太少酒精所以唔當係酒，我去親便利店買都無人阻我，妳想飲？」
我買唔係因為我特別鍾意飲呢樣嘢，而係因為佢有時發神經大特價，可以平到十蚊三罐，所以我就買嚟當汽水飲。
W：「嗯…我想試下。」
於是碗白飯嚟到嘅時候，我又嗌咗兩罐仙地。
個伙記用意味深長但又帶有半點不屑嘅眼神嚟望住我…唓！家陣飲仙地好失禮你咩，使唔使我話你知夜多少少我就會變身做啤酒仔！
我斟咗啲仙地落玻璃杯遞畀Wendy。
W：「咦，都幾好飲喎，唔會太甜。」
我：「估唔到妳未飲過呢樣嘢，其實好common，小學嗰陣我已經成日飲。」我一邊講一邊倒咗一大啖仙地落口，當然係原罐飲。
W：「我邊有你咁曳喎，放咗學我就返屋企，媽咪點會買呢啲嘢放屋企，佢哋都唔飲酒嘅，就算咖啡都叫我盡量唔好飲…」




我：「咁…乖乖女都好嘅…」