我怎可能是女神👸🏻獵人🏹（第一季更新至斷更為止）: 665

Q：「呀！我都死喇！」點會唔死，射手幾槍就夠。
我：「會復活！打兵！唔好打人！」
我feel到QQ喺度滴緊冷汗，終於…佢喺復活出嚟嘅大約一秒內出咗兩個細技，成功殺埋兩隻小兵，再光榮戰死沙場；就係呢關鍵嘅一下，令到對面五條友圍住我哋水晶打打打，但效率極慢。
呢個時候，阿健已經推冧咗高地塔，入到去水晶開始開餐…對面個坦克發覺唔對路，㩒咗回城。
剩返嘅就只係時間問題，我睇住我哋水晶由滿血俾人打到一半，再四份一，而對面坦克亦返到去。
明明只係一場輸贏，但由於拖得太耐，所以全場人都非常熱血，為咗呢最後幾秒而激動不已，喺驚濤駭浪下，我睇住自己水晶得返一絲血，然後畫面停咗，無人可以預計到結果係點。
「Victory！」
健：「屌你！低能坦克！唔返嚟咪你哋贏囉！」佢興奮到彈起身咁講。
佢講得無錯，坦克返到去都清唔切阿健同啲兵仔，只係磨到血，但如果留喺度，就可以加埋嗰一絲輸出。
我：「咁high做乜，多謝我之前幫你清一路啦。」




Q：「呼，原來打機真係可以咁緊張。」
係呀，如果妳打中嘅係敵方而唔係兵仔，輸嘅就肯定係我哋喇…
健：「喂！快啲舉報條粉腸射手呀…屌！做乜扣得三分咁少㗎！乜撚嘢呀！有無咁離譜？！」
Q：「好似贏咗嘅話，就唔會扣得多…」
我：「其實佢只係掛咗兩分鐘咋…」
健：「唓…重諗住會罰到佢無得打排位…咦…咦！喂！阿爽你睇下！」
我：「恭喜晒，你成為傳說喇。」我望住佢閃下閃下嘅畫面，其實我一早計過佢差兩三場就達標。
Q：「係呀？咦…原來我都星耀喇喎。」
QQ show一show佢個畫面，又係升段嘅慶祝動畫；而我，一直就喺星耀中間唔知做緊乜。
健：「太…太好喇…」佢一路講，眼淚又開始流出嚟，有無咁恐怖呀？唔通上傳說係要開心到喊？




Q：「你…無事吖嘛？」
健：「Ku…Kuromi…我鍾意妳呀！嗚嗚！」
乜事呀？！居然堂而皇之咁喺我面前同Queenie表白！呢條友究竟發生咗乜事，係咪食咗熊心豹子膽？！唔係喎，我記得佢同我講過，如果佢上到傳說，Kuromi又上到星耀嘅話就會同佢表白。
我當時聽完當然係得啖笑無咗件事，但我諗佢其實一直都好上心，所以就不停苦練刺客誓要帶到Kuromi上段。
而佢…表完白之後又抱自己塊面落膝頭喊。
如果咁樣可以溝到女，我都好想參考下。
Q：「你做乜啫？！」
健：「嗚…嗚嗚嗚嗚…Kuromi…」