我怎可能是女神👸🏻獵人🏹（第一季更新至斷更為止）: 672

健：「係我錯囉…但妳係女神，唔係成日會遇到呢啲嘅咩？」
Q：「有嘅，但我嘅感覺又會有啲唔同，你知…我哋班女仔會有好多交流，有乜唔知吖，但係，如果一個男仔根本唔認識我，走嚟話想同我一齊，我係唔會考慮，唔係話咁樣嘅男仔一定唔好，但實在係好無感覺，唔會想為咗呢啲人而浪費精神同時間。」
我：「係咩，我成日都覺得妳男朋友唔係太認識妳，先等妳可以喺佢面前扮清純乖乖女。」
Q：「食你嘅牛脷啦！再講信唔信我切斷你條脷落嚟撈咖哩汁喂返畀你食吖嗱。」
健：「…，其實…作為一個女神，係咪想要邊個男仔都可以？」
Q：「欸…嚴格嚟講可以話係，但其實又唔係…不過呢個觀點對我哋嚟講無乜意義，係男仔先會想溝晒所有女嘅啫，唔好覺得我哋好so，有時都會遇到啲麻煩嘅問題。」
健：「唉，呢個世界太複雜，我完全諗唔明。」
Q：「係，有時我都覺得啲女神男神好麻煩，你唔好諗咁多，識返啲普通嘅女仔比較好。」
賊喊捉賊，呢個QQ都算係佼佼者咯。記住唔係狡狡者！我前排寫錯俾QQ笑到面黃。
健：「講就易，其實…我都知Kuromi只係一個幻想，個女仔背影咁靚…又點會理我吖，我要求都唔係好高啫，可以同個普普通通嘅女仔做friend已經好好，點解成年都無得同女仔坐㗎。」




Q：「唔好等運到啦，就算有得一齊坐都未必啱謦，不如主動去識下人重好。」
健：「如果我有呢個膽量嘅話…就唔使咁，可能我一早已經諗辦法約Kuromi出嚟，再食檸檬，哈…」
Q：「係咩，唔知邊個頭先咁大膽，口出狂言話要肆意玩弄我嘅身體呢？」
健：「Queenie…對唔住，求下妳…唔好再講，我已經唔識點面對自己，我知我傻咗。」
Q：「都唔係吖，好正常啫，有邊個男仔唔想揸我對波喎？」
唔知QQ搞乜鬼，當初係Kuromi嘅時候，就玩到阿健癡癡迷迷，到咗而家真相大白，佢重可以繼續戲弄人，真係服咗佢；而阿健當然就唔識應佢，喺度低頭思故鄉咁唔知諗緊乜。
我：「唓，個個女仔都有㗎啦，咪又係軟淋淋脂肪一對，唔好諗住全世界都想渣先得㗎，我就無興趣揩到妳男朋友啲指紋。」
Q：「死，交，叉，仔！你想返屋企家法處置呀？」
我：「自從識咗妳，我早就置生死於道外。」
健：「點解…你兩個可以咁溝通㗎？！」