我怎可能是女神👸🏻獵人🏹（第一季更新至斷更為止）: 684

既然係咁，我大概都估到係乜事，又遇人不淑。
我：『不過我差唔多要返工喇喎…』
屋企去中環大概半粒鐘，再搭船又半粒多啲，一來一回絕對唔係遲到少少就可以了事。
蚊：『係喎…咁或者我周圍問人借下錢啦。』
我：『但返到嚟好似要成三十幾蚊喎，妳唔搵下Carmen叫佢幫妳？』
蚊：『千祈唔好呀！佢重有一科要考，如果你幫唔到我就算啦。』
嗯…我望一望QQ，係可以搵佢嘅，但佢都準備開工，一副興致勃勃咁，同埋搵自己個女神接自己個EX實在係有點兒那…但細蚊又真係無理由唔幫，突然我靈機一觸醒起。
我：『妳等我一陣，我過三分鐘再搵妳。』
然之後我就打電話搵老襯，唔係…係水魚至啱。
我：「喂，健大佬，小弟我有個不情之請…」




健：「搞乜呀，打嚟同我講啲咁嘅嘢…」
我：「細蚊佢喺長洲，無車錢返嚟，而我又要返工，你可唔可以幫我接佢返嚟？」
健：「玩我咩？浪費人力物力，我重做緊功課。」
我：「可以同個女仔謦下欬喎，佢會好多謝你㗎，你又唔係唔識佢，唔係幾開心咩？」
健：「我對你以前嘅女人零興趣囉，好無？」
我：「麻煩你吖，佢得自己一個人，長洲又無通宵船，求下你做下好人啦，最多我而家落樓下畀晒兩份車錢你先，你怕辛苦搭的士都得㗎！」
如果來回搭的士，加埋船票，應該三百有多，貴過晒我今日嘅人工，但都無辦法啦…
健：「傻嘅咩，搭地鐵去中環有學生價，時間都差唔多，搭乜鬼的士。」
我：「咁我而家落嚟畀車錢你好唔好？」
健：「唔使喇，聽日先啦，收你一餐飯做隔夜拆息。」隔夜拆息成日聽到，其實係乜？




我：「公子大恩大德，濟世為懷，小人沒齒難忘，無以為報，臨表涕零，無言感激。」
健：「妖，得把口就最叻，無嚟貢獻…咁我同阿媽講你約我落樓下商場溫書啦，有乜事嘅話要同我夾口供㗎。」
我：「我當然知道，今次真係唔該晒你。」
健：「講呢啲…喂，同埋Queenie佢做乜呀？」
我：「乜嘢佢做乜呀？」我不明所以。
健：「佢send咗幅相畀我…你應該知嘅？」
我：「啊…無嘢嘅，佢貪得意啫，應該啱你口味。」
健：「講真嗰句，其實我有啲驚佢。」
我：「唔使啦，佢有時係怪怪哋，唔好諗咁多。」
健：「好啦，咁我都換衫喇，早啲去早啲返。」




太好喇，有個傻…係好人肯幫我，問題得以解決，於是我又即刻打返畀細蚊。