我怎可能是女神👸🏻獵人🏹（第一季更新至斷更為止）: 697

唉，睇見佢咁樣，我都唔知點幫佢好，又無理由叫QQ得閒氹下佢嘅，反正佢都唔會受；鬼死咁硬頸，細蚊話幫佢J竟然嚇到走咗，畀著我起碼都扭返個抱抱，或者打幾下屁股做報酬啦。今次佢又幫咗我，有無機會可以幫返佢呢？我真係唔知可以去邊搵到個有Kuromi級數嘅女仔嚟畀佢結識，如果請佢玩PTGF應該俾佢打死都似。
食完飯返到課室，阿健隔籬位個傻仔未返嚟，我就去坐一陣先，無乜精神唔想應酬Wendy住。
正當我哋兩個齊齊趴喺枱面感悟人生嘅時候…
瘟：「阿爽，你喺度就實在係太好喇！」
唉，唔方好嘢，陸運會已經完咗N世，呢條瘟神又嚟搵我做乜？
我：「假㗎，認錯人喇，我唔係阿爽。」
瘟：「喂，你條友仔係咪識踢波㗎，嚟緊有個社際比賽，好需要你呢啲咁有活力同天份嘅同學參加。」越多廢話越係伏，千古不變道理。
我：「我唔識踢波，剩係識揸波，下次有手球比賽先搵我啦。」
瘟：「咁就啱啱好，嚟緊真係手球比賽嚟。」
我：「你講真㗎？」我懊悔不已，O住嘴咁望佢。




瘟：「講假，除非你想做守龍門。」
我：「哎吔，上次已經幫咗你，今次麻煩你搵第二個啦，我唔想出風頭呀。」
瘟：「如果咁容易搵到人我就唔使嚟求你啦，自從上次睇過你玩陸運會，就覺得你骨骼精奇，絕對係可造之材，社際足球嘅一員捨你其誰？」
我：「咪玩啦，見我跑到仆街就知我唔掂啦。」
瘟：「非也，我睇返德爺啲錄影片，見到你跌得非常有技巧，明明空轉咗一大個圈，落返地又無乜事只係輕傷，我覺得呢個動作攞嚟做倒掛金鉤都無話唔得。」
我：「放過我畀條生路嚟行下啦，成間學校咁多人…」
瘟：「你以為學校有好多人咩？學校有四社，一級有四班，即係每form就有一班係我哋社，而家無咗form six得返五個form，即係五班喎，每班大概三十五人，乘埋就係一百七十五，扣返一半女仔就得八十幾人，而啲中一二又太細粒，再扣埋啲體弱多病，或者跑都跑唔郁嗰啲，剩返可能四十人唔夠，而我哋踢七人足球計埋後備起碼都要有十條友，所以我點都要嚟搵你㗎嘞。」
QQ講過呢條友有三呎不爛之舌，用軟嘅怕且唔會起到任何作用，睇嚟要硬起心腸至得。