我怎可能是女神👸🏻獵人🏹（第一季更新至斷更為止）: 699

瘟：「嗯，我都係，同埋你哋form有啲人唔係幾鍾意我…」
B：「好正常呀，你mark起咗兩個玩得嘅女仔。」
瘟：「真係唔關我事喱，佢哋本身就諗住做幹事，但又唔肯做社長，又無其他男仔想做，我都係俾人焗上去，嗰兩隻嘢有份玩埋我一份。」
按道理，佢應該欲拒還迎，心中暗喜。
B：「咁唔知你嘞，我唔熟中四啲人，可唔可以彈到個人畀我？」
瘟：「機會係有嘅，但唔大，一換一OK？」
B：「可以，我試下，之後再謦。」
瘟：「好，返返嚟呢邊，阿爽，同你個friend一齊踢啦，好唔好？」
我：「呢啲好似唔係叫一齊踢喎，佢會變成敵人。」
B：「你唔一定要幫佢㗎，佢哋社少個人，我哋社贏面就大啲。」




瘟：「哎吔，師姐妳唔好倒我米啦。」
B：「哈哈，咁唔阻你，我過隔籬班繼續搵人。」
而呢個時候，QQ亦都食完飯返到嚟課室。
瘟：「Queenie，可唔可以幫手叫你個friend踢波呀…」次次都係咁…
Q：「做乜唔踢呀？你平時都有玩開㗎。」
我：「我平時只係喺街場玩，點同正式七人場。」
Q：「你入到波嘅話會迷死啲女同學㗎喎。」
我：「唔需要，我心如止水。」呢句係真嘅。
Q：「社長，如果佢玩嘅話有無嘢可以益下佢？」
瘟：「計埋上次陸運會啲成績，或者可以叫阿Sir畀個小功佢嘅。」




我：「小功係乜嚟㗎？」
Q：「你有無攞過缺點呀？」
我：「有呀，中一二各攞過一個。」
Q：「衰嘅叫缺點，相對好嘅叫優點，再衰嘅叫小過，三個缺點就會變一個小過，相對好嘅就叫小功，印落成績表度會好睇好多。」
我：「唓，又唔食得又賣唔到錢…」
瘟：「咁…可唔可以幫下手呀？」
我：「幫囉，我行下跑下傳下波㗎咋。」
瘟：「夠㗎喇，如果贏咗，都會有餐好嘅請你食嘅，唔使你出錢。」
我：「咁就差唔多！」
瘟：「我都會落場㗎，到時一齊玩得開心啲！」




結果，我又俾瘟神當做水魚，但如果QQ想我去踢嘅話，我就當然義不容辭啦。
W：「你好似好受歡迎咁喎。」
我：「邊係呢，俾人搵笨，捉咗去玩泥沙。」
W：「唔係去踢社際足球咩？到時我可唔可以嚟睇？」見到佢一面興致勃勃咁，我都唔知點好。
我：「可以嘅，雖然我都未知點安排。」