我怎可能是女神👸🏻獵人🏹（第一季更新至斷更為止）: 751

考完試返屋企換衫，原來QQ都返咗嚟，佢除走咗條校裙，著咗件淡粉紅色嘅襯衫喺度搽唇膏，但係下半身就無著嘢嘅…sorry，唔係乜都無著，而係有條粉藍色嘅底褲。
呢個女人越嚟越當我無到，完全唔放我喺眼內。
我：「妳好似…都幾忙下咁喎。」
Q：「嗯，你唔記得我今晚約咗人咩，諗住一陣唔返嚟執喇，咪一次過囉，你唔使理我，一陣我會嚟睇你踢波㗎喇。」講到咁好聽，都唔知妳係想睇我定係睇社長踢，雖然妳講到對佢無乜興趣。
就係咁，我有我換衫，理得佢…
Q：「你話…呢條白色百摺裙好，定係格仔裙好。」
我：「妳又唔係約我，問我嚟做乜喎…」
Q：「咁如果係同你出去呢？」
我：「我覺得妳著乜都無所謂，一樣咁靚女。」
Q：「你估我好想諗咩…天氣咁熱，我夠想背心熱褲就出去，但唔係同你吖嘛。」


我：「無問題，全世界男人都鍾意背心熱褲，越少布越好，露越多肉越好，唔會有分別，瘟神睇到會一樣咁開心。」
Q：「妖，你明知我唔係啲咁嘅女仔。」
我：「咁妳直播咪係一樣賣肉。」
Q：「咁點同喎，嗰啲係為錢，而家係約人出街。」
我：「唔好唔記得妳同仔出街都有得呃飲呃食呃禮物。」直頭係劏水魚咁款。
Q：「問你嘢都無貢獻嘅，快啲走呀。」
唓，好叻咩，妳估剩係得妳有仔約咩？如果我要…如果我真係要…我要屋企個麻煩女仔就夠。
唉，下個禮拜四咪有女魔頭約我囉，都唔知去做乜，真係麻鬼煩，雖然佢都係靚女一個…
落到場，一邊練波一邊同阿健吹水。
我：「係呢，你到時係咪會係正選嚟？」


由於我哋本住個個有得玩同唔使踢得太辛苦嘅原則，都係九打九或者十打十，唔夠人甚至捉埋第二個社嘅嚟夾，因為本身踢開校隊班中四中五都好friend下；所以呢，對於比賽嘅時候到底會出邊七個先都唔係太肯定。
健：「本來就唔係，但有個中五師兄下個禮拜就飛，所以決賽日一定係，而星期五都實有機會俾我出場，Bubble師姐話嘅，咁你呢？」
我：「應該就係，都唔會有人同我爭打後衛，瘟神話如果我跑得郁俾我踢晒全場都得。」
健：「咁實得嘅，全場都係一粒鐘多啲…你睇下你幾幸福吖，有兩條女嚟睇你踢波。」
我：「Queenie係鬼嚟睇我，佢嚟睇社長咋嘛，順便同班姐妹嚟social。」除咗QQ之外，Yvonne同埋Uranus都嚟埋，U就一直活躍喺學校嘅體育活動嘅，而Y呢，就點計都唔係嚟睇我；至於，QQ同瘟神今晚嘅秘密勾當就當然無必要俾佢知。
健：「又會放咗學咁快就換晒衫嘅。」