我怎可能是女神👸🏻獵人🏹（第一季更新至斷更為止）: 753

我：「又唔係真係分別…唔使咁認真嘅…」
拜託真係唔好咁認真，講下笑就好，咪嚇我。
同女仔行，呢段路程都成十幾分鐘，途經一個大商場。
W：「呀，我溫書寫到啲螢光筆無晒墨，可唔可以陪埋我去買？」
我：「可以呀，隨便買，我大把時間好得閒。」
如果有研究開女仔筆袋嘅話，應該會知道入面係有幾豐盛，淨係啫喱筆都已經有好幾種顏色；而男仔通常就一枝原子筆走天涯，不過有啲仔個筆袋都會有好多嘢，例如斷墨，或者無蓋無端嘅筆，劈到崩晒嘅間尺，永遠斷芯嘅中華牌鉛筆，硬化到裂開嘅擦膠，漏汁嘅塗改液…
所以呢，女仔係特別鍾意行文具鋪同精品店。
喺佢揀緊螢光筆嘅時候，我就留意到隔籬有個貨架，估唔到呢樣東西而家重存在緊。
W：「喂，想買生日熊呀？」
我：「唔係呀，見佢哋得意望多兩眼啫。」




W：「扮吖你，明明茜旎就生日。」
我：「啊…原來妳係知道。」
W：「以前見過男仔送生日禮物畀佢吖嘛，又係學期完之前。」
我：「係嘅，做女神有乜可能無生日禮物收。」
W：「唔知呢，今年就唔覺，可能因為大家都知佢明花有主掛。」點睇佢今晚都有嘢收。
我：「咁妳知唔知佢邊日生日㗎？」
W：「點會知喎，同佢又唔係好熟，剩係知道大概係月中，呢樣嘢你自己問佢重方便啦，你唔係真係諗住買嗰日嘅生日熊畀佢呀？」
我：「唔啦…問完怕佢有乜期望，都唔知可以送乜畀佢，生日熊應該唔work。」
W：「我都覺得唔work，以前我就諗，如果個個都鍾意送生日熊，咁可能一年已經收到幾隻，再儲幾年就成屋都係同一隻熊，好奇怪，而且以Queenie屋企環境，佢真正需要又或者收到會開心嘅物品，應該唔係我哋買得起，或者可以隨隨便便就買到嘅嘢嚟。」
我：「咪係囉，所以我先唔敢問佢幾時生日。」




W：「或者呢個？都唔係貴吖，起碼可以表達到你嘅心思，重要花時間去砌，如果你鍾意嘅話重可以放埋隻熊仔入去。」佢指住包手工屋仔。
我：「欸…但要佢收我呢啲好似有啲怪。」
送畀佢然後擺喺我屋企？而且我無端端喺屋企砌啲咁嘅嘢係人都估到乜嘢事啦，重可以想像到佢一定會話我無鬼聊。