當然係我哋隊領先啦!好鬼犀利呀!而且得返十幾分鐘,對面想追都難!
係咪想屌我呢,乜鬼精彩場面都skip晒…吹咩,又唔係我入波,做乜我要形容畀你哋聽,唔通瘟神入波睇到班師妹出晒水又關我事咩?我同你講,乜都skip得,分分鐘我下章就已經同QQ交配緊。
我都想…一齊發夢吧。
不過呢,成日陪班叔父喺酒樓睇波,其實無乜人得閒望住電視嘅賽事,多數係昅住電話上面十幾場嘅即時賽果,對住啲數目字鬼殺咁嘈。
有無聽過林子祥嘅數字人生?一切都係數字嚟。
股票得個號碼同銀碼,無人理間公司做乜。
學生嘅成就就係成績表,唔係睇你點溫書同點填答案,呢個世界就係咁。
喺優勢之下,班師兄上晒電咁壓住對面嚟打,靠到鬼死咁前;不過無乜所謂嘅,我哋算係技高一籌,對面畀嘅壓力唔算好大…點知一講完個波就俾對方後衛大腳解圍兼且飛過半場落入側翼,而且中鋒亦都衝緊過嚟,後場得返我喺度…
側翼推波推得好快,導致個波同佢有一段距離…無論點我都要上前壓制,如果俾兩條友一齊靠近禁區實在太危險,寧願迫佢及早出波或者推落底線爭取時間空隙等隊友回防。
Well,雖然我一開始只係話落場行下湊人數。


側翼跑呀跑,非常快,睇個樣想直衝底線先出波或者博個角球返嚟,呢邊唔係我慣用腳,如果要搶個波返嚟實在係好有難度,隨時戟到自己人仰馬翻。
不過…我都跑得好快!衝衝衝衝衝!一㧻!
呵呵!個波俾我㧻咗出邊線…嘩!唷唷唷!
對面唔死心想夾硬出波,明明我㧻波在先,點知佢隻腳就一嘢噬咗落我腳腕度…
我:「嘩唷嗚嗚嗚嗚!」順勢瞓落地兼轉多兩圈。
「咇咇!」聽到雞聲,掂咗!本來對面界外球,而家變成我哋嘅罰球。
瘟:「你無嘢吖嘛?」都算佢有啲人性,識嚟關心我,而唔係因為贏到罰球而興奮。
我:「如果有嘢係咪可以叫文書財政姐姐抬我出場兼幫我敷冰?」
瘟:「如果係佢哋…我驚你傷多兩錢重添,重識講笑即係無嘢啦,跌得鬼死咁真。」
我:「跌係真嘅,只不過我夠硬淨。」


瘟:「使唔使抖下呀?」
我:「係咪真係可以抖先?」
瘟:「我換個前場入嚟,自己踢後少少囉,領先住兩分,應該無嘢嘅。」
我:「咁我就恭敬不如從命嘞!」
然後我就一隻重心腳彈下彈下咁離開草地,原來…QQ已經喺看台衝咗落嚟場邊…
Q:「死人頭…你無事吖嘛…」
我:「有,而家需要妳幫我啜毒,同埋奶力共振按摩先救得返,如果唔係就要切走隻腳。」
已有 0 人追稿