我怎可能是女神👸🏻獵人🏹（第一季更新至斷更為止）: 773*

致nt。ps，你要嘅大波姐姐劇情焗緊喇。
生命無常，世事多變，無論你喺邊，相信你收到我嘅心意。
你啲文字重好嫩，但係有潛質嘅。

我：「得啦，好小事啫…又係陸運會踢下波。」
瘟：「你個死仔包重話唔係同Queenie有嘢？」
我：「咪就係我同佢係朋友囉，咁簡單。」
瘟：「古古怪怪咁，都唔知你有啲乜打算…」
我：「無…公平交易啫…但我有樣嘢想問返，你頭先話想同自己真正鍾意嘅人一齊，唔想是但集郵心態，希望有珍貴回憶…咁…你又點解想知邊個師妹對你有興趣，佢哋同女神有好大段距離。」
瘟：「咪就係，成年無拖拍，悶死咗我，以為做社長會有so，點知忙到黐孖筋，重要俾師姐調戲，反而無乜女仔接近我…女神又追唔到，畀個普通女仔我同佢玩下都好吖。」




我：「你…唔係咁賤男呀？我唔想害咗師妹。」
瘟：「係同佢哋玩，我唔會玩弄感情喇，唔使擔心我傷害妹妹仔，我都係由得佢哋想點就點，或者玩落會鍾意咗呢，又或者…到最後，佢會憎我唔愛佢，鬧我賤男再兜巴升我，咁可能都係愛嘅感覺。」呢個moment，我覺得有啲雞同鴨講，佢又唔明白我想點，我亦理解唔到佢嘅愛情哲學。
我：「你肯定…唔係為咗呃蝦條？」
瘟：「唔係囉，我第一次好珍貴㗎，點會隨便畀啲妹妹仔，寧願俾Queenie呃蝦條都唔畀佢哋。」
Oh my god，佢啲主動被動主謂賓係咪錯亂晒。
我：「如果Queenie唔鍾意你，但欺騙你感情，玩弄你嘅好意，再呃埋你J數，你會點？」
瘟：「非常好，只要係Queenie，我唔介意同佢發展任何關係，做兵做奴隸都得，乜都可以畀佢，但…我只係感覺到佢想避開我。」
我：「…」黐線，愛情果然係嘅瘋狂又盲目。
瘟：「好喇，唔再講佢，我都要向前望，多謝你同我謦欬，下個禮拜，球場上一齊努力啦！」
呢個師兄，都算係一個特別嘅人，唔識形容。




而我竟然可以喺剎那之間deal到啲嘢返嚟…嗯…其實我都未諗到個大概，但重有成個禮拜，乜都可以從長計議，Bubble姐姐…嘻嘻。
呀，重有下星期四…死人Yvonne到底想點？
明明考晒試，應該要日日攤喺屋企打機㗎嘛，點解今年咁忙㗎…再加上下星期三要揀科。
首先我要返屋企沖涼換衫，抖一陣就煮mum mum食，跟住重要返工…
Q：『我哋食咗份crepe咋，無嘢食攞返嚟，你煮埋我嗰份啦，唔使太多就得。』拜託妳唔好再周圍買餸，如果唔係妳所有姐妹都會發現妳唔妥。
我：『我好肚餓，已經準備緊炒三個公仔麪，妳返到嚟想食幾多就幾多啦。』
Q：『可唔可以唔用麻油味包粉嚟炒？』
我：『可以呀，嫌太鹹我咪唔落囉。』
Q：『唔係嫌太鹹，我係嫌太悶，用第二包粉啦。』
我：『即係點？雞蓉味炒公仔麪？』哭笑不得。




Q：『唔要雞蓉…我記得有香辣豬骨味。』
我：『都得嘅，如果妳要，辛辣麪嘅粉都有。』
Q：『你鍾意啦，好味就得。』