拜託,最多掉我去Bio班好喇,就算無得同QQ做同班同學,我都唔想同韻婷一齊背書。
鄧:「咁我都知你剩係得計數有啲天份,而你呢個學期應該係喺某人嘅幫助下有幾大進步,但你要知道,分班唔係剩係睇呢個試,你上學期只係考得麻麻地,中二嗰啲更加無謂提。」
我:「Miss…咁即係點呀…」唔好玩我得唔得。
鄧:「單論成績同競爭人數,可能真係唔夠人嚟,但係呢,有啲同學仔其實唔係咁啱讀physics班嘅,所以…佢哋就未必讀到自己嘅first choice,而你就照返你填嘅去讀啦。」
我:「咁就唔該妳唔好嚇我啦…」
鄧:「我係驚你無咗個私人Miss會讀唔成書咋,好歹我都有同你幫口,你應該感謝我至係。」
我:「係係係…鄧老師千歲千歲千千歲。」
鄧:「我千你個頭呀,我廿幾㗎咋!」
我:「點都好啦,唔該晒你。」
鄧:「最後我想問下,你同Queenie嘅生活,OK嘛?」


我:「做乜唔問佢喎,妳啱啱都見完佢。」
鄧:「問佢嘅話太官腔,無乜意思。」好難想像一個老師會話學生官腔,即係我夠古惑仔啱做線人或者臥底?
我:「我哋嘅生活…咪又係咁,佢又佢嘅工作,我有我嘅忙碌,佢有佢嘅性生活,我無我嘅性生活,大致上都係咁。」
聽完佢又滴汗咁款,好心咁擔心嘅話就唔好問我啦。
鄧:「你認真係無性生活吖嘛?」
我:「就算我認真都唔會有啦。」
鄧:「打下J都無?我唔信。」
我:「咁…打飛機都可以當做性生活㗎咩?」
鄧:「都係解決生活嘅其中一種方式嚟啫。」
咁我祝妳性生活永遠幸福美滿。


鄧:「總之你兩個一齊住,就要好好互相尊重,互相遷就,知唔知呀?不過呢,我就好開心,因為呢一個學年你哋都無畀到麻煩我,祝你兩個好運啦,雖然下年無論有乜事都唔會再關我事…」
呢個Miss…人哋就講兩分鐘,我就講成五分鐘,容乜易搞到啲同學以為我犯咗乜彌天大罪。
W:「咁耐嘅,無事吖嘛?」
我:「無,以結果嚟講係滿意嘅。」
W:「咁就好,不如…一齊去食飯?」
呢個學年,只係剩返最後一兩餐飯,唔會唔好嘅,就咁睇佢個樣都好平常。阿健佢就重等緊結果,我懶得理佢喇,作為兄弟佢都會識做嘅。
W:「睇怕會係今年最後一餐,不如食認真啲?」
我:「好呀,妳話事就得。」Wendy話認真當然無所謂啦,最多咪一二百,右女神嘅話就唔同講法。
佢帶咗我去一間冰室,大概就係茶餐廳嘅高級版咁上下啦,去到嗰陣都重未夠十一點,要等多幾分鐘先有午餐嗌,我哋就睇住餐牌先。
已有 0 人追稿