我怎可能是女神👸🏻獵人🏹（第一季更新至斷更為止）: 806

我：「Yvonne，唔好咁啦…」
Y：「你再講多次先啦。」
我：「講…乜嘢呀？」
Y：「講我鍾意聽嘅嘢囉。」
我：「Yvonne，我愛妳。」兩次背主了…
跟手我又輕輕一吻落佢嘴唇上面。
我見到佢笑得幾甜，同一個熱戀中嘅少女無乜分別，今鋪實在係大鑊，男人見到呢個表情都唔會走得甩；我唔信一見鍾情，但感覺確實可以製造。
Y：「你就想呀，你係我玩具嚟㗎咋。」
我已經分唔清楚佢邊隻笑容打邊隻笑容。
我：「你話點就點啦…」我認我無力反抗…




Y：「咪住先，你唔應該叫我Yvonne，感覺好見外。」佢真係每一個細節都諗埋。
我：「妳都講得啱嘅，平時…妳男朋友點嗌妳？」
Y：「呢層…唔多啱用…咁你又點嗌Queenie㗎？」
我：「我都係叫返佢做Queenie㗎咋。」
Y：「吓…咁悶㗎，你兩個真係…」
我：「咁我同佢都只係好好好朋友關係，最多…」
Y：「如果佢肯做你條女，你會想點叫佢？」
我：「我諗我會叫佢做QQ。」
Y：「OK，good，咁你就嗌我YY啦。」
YY…今次真係唔方唔歪晒嚕…不如畀我爽YY埋啦。




我：「YY，妳今日好靚女。」
Y：「呢層我知道，認真啲先，我哋要準備出發。」
我：「但係呢幾大袋嘢點算？」咪我嘅背囊，波鞋，除出嚟嘅衫褲，重有電話銀包。
Y：「攞晒啲嘢，跟我行啦。」於是，佢帶咗我去商場嘅收費儲物櫃位置，其實我知世界上係有呢樣嘢，但呢一樣嘢又從來未喺自己世界出現過。
佢揀咗一個頗大size嘅locker，租足全日都唔方平得去邊，但錢嘅嘢唔輪到我嚟擔心啦，然後佢就好暴力兼且無嚟章法咁將我所有嘢塞晒入去鎖門…睇嚟就算係富家女都會有野原美冴嘅通病…
我：「好！行得，靠妳帶路喇。」我熟練咁拖起佢隻手，就好似一對情侶拍拖去玩咁。
然之後佢帶我落返去商場地下，上咗…
Y：「唔該西貢碼頭吖。」
又係嘅，女神出門無理由要煩交通。
我：「其實…我一陣要去做乜㗎？」




Y：「放心啦，就算你想做你都做唔到啲乜，純粹去玩㗎咋，飲飲食食咁囉，見步行步就OK，我知道你識執生嘅。」
我：「就算妳同條仔嘈緊，都可以自己去嘅啫。」
Y：「你就唔好明知故問啦，家陣同我拍拖好慘咩？」鬼唔知妳又要威又要戴頭盔咩。
都真係有啲慘㗎，咁樣同妳拍拖法，付出完都無合理回報嘅，雖然已經惜咗…