我怎可能是女神👸🏻獵人🏹（第一季更新至斷更為止）: 822

A：「嗱，總之唔好學檸檬咁唔插線彈電結他呀下，我隨時會熄背景聲㗎。」
跟住就係耳熟能詳嘅intro，不過加插咗團長嘅個人演繹，同埋兩枝嘢嘅現場彈奏。明明呢啲歌係我出世以前嘅作品，但啲細過我嘅團員個個都好似好熟悉咁。
年輕得碰著誰亦能像威化般乾脆…
廿幾條友喺度唱K，有live band，有DJ，原來就係咁嘅一回事，根本唔需要咪，全部人就會搭住膊頭跳下跳下一齊開口同個喇叭鬥大聲，呢種發洩真係十分之釋放。
本來就型過檸檬嘅奧丁當然唔使講，比較平實嘅Gabriel攞起枝電結他後就好似變咗另一個人咁，佢札行個馬，瞇埋隻眼，雙手飛快咁喺六條琴弦上面跳動，我聽得出佢所彈嘅音符已經脫離咗原曲，而係用自己嘅意志配合團長嘅靈魂嚟彈奏，系統嘅伴奏亦漸漸變得細聲…呢首歌，好係好，但我本來係覺得有啲悶同造作，喺佢哋嘅即場重新編排下，成個感覺立體咗好多，完全表達到熱血激昂嘅氛圍，如果我而家聽緊嘅係叫活著，咁檸檬隻CD就應該只可以叫躺著…
望住出面嘅三個男仔，實在係各有特色，如果我係一個女仔都唔知點揀好，我淨係知唔會揀自己；女神，本來就應該係配男神，佢哋先至活喺同一個世界裡面，如果唔係QQ坐我隔籬再遭逢巨變，放咗學之後就欬都唔會謦多句啦，何德何能攬住YY喺度玩，我係有自知之明…要成為男神，需要天時地利人和，首先要出世喺一個富裕家庭，然後個樣唔可以生得差，最好做到學霸，運動藝術樣樣掂，缺一不可…重要天生異稟有食完女唔會俾人唱嘅特殊能力…
以我咁嘅德性，都唔知QQ會點睇我…唉，如果…聽日入到波都好嘅，雖然機會渺茫。
算，都係唔好諗咁多，明天事明天辦，今日已經夠晒我頭痛；活在當下啦，跳下嗌下都幾開心，就好似其他小朋友咁，每日大一歲好快就唔使再衰十一！
A：「檸檬唱完歌要點㗎？！」
丁：「團長叫到！我犧牲一次啦！」




奧丁佢雙手交叉，好用力咁除咗件衫出嚟掟去啲觀眾度，然後一班妹妹仔…當然，Gabriel係唔會同佢兩個一齊癲。
「嘩！奧丁哥哥件衫呀！」幾隻手一齊伸向半空…
絲：「佢啱啱跑完步，臭㗎！」
「嘩！真係！走呀！」「臭彈呀！」「農藥呀！」
就係咁，佢件衫俾啲靚妹掟嚟掟去，直至唔知飛咗去邊個角落，而佢本人就係出面攤攤雙手毫不在意；赤裸上身嘅奧丁，唔得掂…有如神賜畀佢嘅完美身型，話佢喺動畫入面走出嚟都有人信。
而我身旁嘅YY當然唔會同啲妹妹仔癲，只係見到佢留意住奧丁嘅胸肌同腹肌，雙眼閃出奇異嘅光輝，喉嚨亦有不尋常嘅動作；都明嘅，以YY嘅黐線性格，見到啲咁正嘅嘢點會唔想開餐，明明頭先重喺度話我鹹濕，如果奧丁想臨幸佢嘅話，我諗即刻起水添呀…
「有無得點歌！我要X-Japan！」