A:「得嘅,嚟個triple stop string crossing加左手picking應該唔錯。」
Y:「你唔好話畀多部琴我!」
A:「一早講咗四條線唔夠妳玩㗎啦。」
Y:「自己幫我補啦,你成大堆制喺度。」
以我嘅愚昧,當然唔知佢哋講緊乜;不過Alfonso就走去咬Queenie耳仔,原來可以咁嘅,明明人哋個老公就企咗喺隔籬…重要講咗成半分鐘有多。
音樂開始,YY同背景聲一齊用violin拉intro,咦,原來我聽過㗎喎,雖然唔識歌名,但記得係好聽…
喺幾下中音之後,YY嘅violin就取代咗原本嘅歌聲,咁背景重有啲提琴伴奏,我開始明白團長佢哋講緊乜,即係叫YY好似彈琴咁,用低音弦拉伴奏同一時間用高音弦拉vocal,問題係…violin本身要同一時間用晒兩隻手先出到個音…憑我嘅豬腦嚟諗唯一辦法就係兩個人加兩部琴。
唉,唔知呀,我剩係識用QQ部keyboard駁落電腦用兩隻手㧻下㧻下佢個右手譜,聽住部電腦自動播左手譜,幻想佢喺我隔籬彈。
Gypsy女郎,為誰而唱…我個腦竟然補完咗明明就唔識嘅歌詞,呢個時候Queenie嘅bass開始進場,喺高低音相撞之下成個畫面即刻rock咗好多,出奇地嘅係團長佢無乜動作。
完咗第一段,又係YY嘅solo melody時間,唔怪之得團長話佢蝦姐姐啦,呢首歌嘅伴奏本身就有大量小提琴,而家佢重拉埋本身唱嘅部份。


你會感受愛,感受恨,感受原諒…每一句都有Queenie嘅bass聲,係好重嘅三連拍,比起原版嚟得更加激動,配合埋Queenie擘大雙腳彈到䟴下䟴嘅姿勢,條馬尾不停左右飄飄,就算對音樂無大興趣嘅我都俾佢深深吸引住;我諗,佢拉viola嘅時候應該唔會係呢個樣。
另一邊廂嘅YY就打側企返一個好正式嘅姿勢,一邊高貴,一邊野性,兩位靚女用佢哋對音樂嘅認知嚟合奏,亦同時對決,呢種衝擊實在係令到我差唔多氣都唔記得抖,心口抽下抽下咁。
完咗第二段,系統播出solo嘅結他聲,兩位靚女即時停晒手,點知團長佢開始扭細啲音樂聲再指住YY,而YY佢就即刻get到用自己嘅小提琴聲去取代背景嘅電結他聲,直至團長完全mute晒個background。
喺無以為繼嘅情況下,YY只可以首先將手頭上面嘅音符完成,一邊望住團長等待指示。
喺將近完成嘅時候,團長用手勢指示QQ收音,同一時間打開咗佢set嘢個beating,而我感覺到係快咗嘅,應該有兩三成左右,再唔知點樣佢fill到啲鼓聲落去,跟住…條友喺度自己solo Lydia嘅melody;YY講得無錯,呢條友係黐Q線,一條友要安排晒幾種聲效,再同一時間加埋effect,佢repeat咗最激嗰句幾次,由normal,轉為升pitch,最後連key都唔同埋,成個場嘅氛圍由佢一人控制,兩位靚女完全企喺度無嘢做到。
已有 0 人追稿