我怎可能是女神👸🏻獵人🏹（第一季更新至斷更為止）: 829

G：「喂！小心啲呀！」我俾佢嚇咗一嚇。
我：「嗯？做乜呀…」我望咗兩下，無事呀，無打爛嘢，啲食物都好正常攤喺張枱。
G：「你條魷魚鬚呀！就揩到件衫。」
啊，原來係咁，我望住手上面盤魷魚鬚發呆，入面有其中一條比較長同曳嘅鬚叉咗出嚟，其實已經有小小掂到我件衫，整咗啲咖哩汁上去。
我：「噢…唔該晒，好彩黑色衫唔太覺。」
我隨手就用手指彈走衫上面嗰滴汁。
G：「係啫，都小心啲啦，件衫唔平…」佢好似無我呢個小朋友咁好氣咁。
平時酒樓做開嘢，又點會為意呢啲，執完枱隨時成件衫左一笪右一笪，橫掂之後又唔係我洗。
我：「咁都係屋企人錢啫…」係囉，正常學生有乜可能會自己搵到錢買呢啲，就算我識搵錢都唔會啦，大拿拿過千蚊，夠玩ptgf咁滯，雖然就算攞嚟玩女我都唔會捨得。
G：「到你識打工搵錢就唔會咁講㗎喇。」




我：「希望啦，哈哈哈…」實情係我每次見到QQ食晒成包東東雲吞王我都會有啲心痛。
G：「會唔會悶親你呀？嚟呢啲場合…」
我：「都OK嘅，當睇你哋表演都幾開心吖。」
G：「睇你個款都係俾Yvonne夾硬捉過嚟㗎喇。」
我：「無話夾唔夾硬嘅，橫掂我又無乜作為，唯一可以做嘅嘢就係陪佢飲飲食食行街買嘢，佢叫到就點都會陪下佢嘅，鬼叫佢肯做我女朋友，其實…同佢行街都係好鬼悶。」
我都唔知自己噏緊乜，YY落咗order要我營造出不羈敗家仔嘅感覺，我諗差唔多掛。
G：「睇你個樣又唔似咁抵得諗喎，唔係應該趁女朋友唔得閒嗰陣去偷跳咩？」
睇嚟，佢都想測試一下我係咪不知所謂嘅敗家仔…
我：「哈哈…要玩嘅嘢…來日方長，唔使急於一時嘅，費事啦，可能佢好快頂我唔順呢。」
我不知所云嘅答案換嚟佢一個迷離嘅笑容。




「矇著耳朵！那裡那天不再聽到在呼號的人！」
我：「哈哈，佢哋真係jam緊beyond。」順帶一提係加咗好多奇怪結他聲，個pitch又拉嚟拉去。
G：「如果家駒聽到應該會激到彈返起身。」
我：「放過佢哋啦，最緊要開心啫。」
G：「當聽唔到算，如果可以唔使嚟我都唔會嚟。」
我：「吓，但係明明你都咁鍾意玩音樂。」
G：「唔同㗎，夾band同管弦樂係兩個世界嚟。」
我：「都係樂器有啲分別啫，應該唔難適應嘅。」
G：「嘿嘿，你果然係唔識音樂嘅。」