我怎可能是女神👸🏻獵人🏹（第一季更新至斷更為止）: 831

我諗…係因為你個樣生得唔似玩嗰啲掛，雖然你唔係樣衰，但比起團長…結果穌哥先係可以控制一切邏輯嘅男人，究竟佢有無食過Queenie姐姐…
雖然，我曾經都以為自己可以令到多幾個屋邨妹傷心，而如今我竟害怕Wendy…
我：「其實Queenie咪係band妹嚟囉，不過你唔捨得傷害佢嘅，我睇得出。」
係，我睇得出Gabriel唔係話特別正經想追求純樸愛情嘅男仔，如果有機會畀佢玩睇怕佢唔會忍，但目前相信佢已經俾Queenie食住咗，至少以band妹嚟講我覺得佢硬淨過Angel好多。
G：「咁無謂啫，邊個唔開心都唔好吖。」
「圍著老去的國度！圍著事實的真相！」
G：「睇嚟你同Yvonne嘅感情幾好咁喎。」
梗係好啦，一切都係假嘅，扮出嚟嘅永遠最真。
我：「一時時啦，佢呢啲女仔其實都有麻煩嘅時候，但好簡單，喺佢發脾氣嘅時候你要不為所動，望住佢微笑，只要夠硬淨佢最後就會投降，到時再氹返佢就搞掂。」
G：「真係無諗過原來佢男朋友會好似你咁，都幾有意思呀下。」




我：「原本會以為係點呀？」
G：「原本…算啦，又估唔中，但望到你哋呢啲咁簡單直接嘅感情，實在有啲令人又愛又恨。」
我：「點解喎，明明Queenie就咁好。」
G：「點講好呢…就好似管弦樂同夾band咁，我覺得兩個人可以為愛喺埋一齊，又或者為關係喺埋一齊都得，但當兩樣嘢撈埋一碟，我就覺得有啲唔知點咁。」
我：「無所謂㗎，各取所長，好似團長咁型！」
G：「弊在我唔係佢呢，曾經我都天真過㗎，如果唔係初中嗰陣俾師兄拉咗去夾band…喺中二嗰年暑假我同咗個女同學一齊，好快就熱戀，好傻咁話要一生一世，第時個婚禮要點，生個BB點改名，約好十六歲一齊失身，後來覺得要等太耐就話要偷偷提早一年…」
我：「咁睇怕結果都係…」
G：「嗯，想象中美好嘅愛情好快就燒完，其實咪又係兩個人無所事事為一齊而一齊，中三開學我走去夾band，好快就沉迷咗，嗰陣佢搵我食lunch我都話要練歌無理到佢…」
我：「我諗…你係想講你哋個關係係無靈魂？」
G：「嗯，就好似無靈魂嘅音樂我實在係玩唔到落去咁，好快佢就俾第二個男仔搶咗，出奇地我竟然無乜傷心，重覺得以後可以自由自在，同時喺度笑愛情嘅虛幻…不過諗返轉頭，我當時對佢又真係唔好，而個女仔同佢男友而家重好正常咁一齊緊，或者係我以前太自我，白白咁放手咗一段本來可以好好嘅愛情。」