我怎可能是女神👸🏻獵人🏹（第一季更新至斷更為止）: 840

我：「嚟吖，等我幫下你。」我將兩枝叉架起咗。
我同佢夾手夾腳將兩個好重嘅保溫箱推咗去邊邊嘅一張高枱下面，搞乜鬼呢，明明已經成枱嘢食…
點知佢一打開！係冰呀！Sorry，唔使太興奮，就算去disco都唔一定要揩冰嘅，呢啲係凍飲加三蚊嗰啲冰，而且重有汽水，果汁，綠茶，啤酒，威士忌，方型樽，綠色樽，扁樽…
我：「原來你重係bartender嚟…」
A：「YO！唔識調酒點開disco喎！係咪？！」佢已經用個mixer兜起咗幾粒冰喺度戳下戳下，睇嚟真心想開disco，今日全程最興奮就係佢。
計我話，你溝多啲女返嚟服侍客人先叫贏在起跑線。
我：「團長哥哥你使唔使咁癲…」
A：「呵呵，係咪型得滯？我都知㗎喇，不過唔好愛上我喎，我唔係基嘅，亦唔想俾Yvonne斬死。」
唔通佢都知道YY係一個變態女人？
A：「嚟！同我講，你條女鍾意飲乜，等大佬我幫你㨃冧佢，咁你就可以為所慾為！」




我決定撥一盤冷水幫佢洗下面。
我：「椰子味雪糕紅豆冰加竹葉青。」
A：「你唔係諗住我會擺個樹熊咬樹葉唔撚係掛咁嘅樣出嚟呀？」其實樹熊係食尤加利樹葉，熊貓先係食竹葉…
我：「好，今次認真，一杯橙加grapefruit加君度加soda上面放粒車厘子，另一杯要青檸加ginger ale加薄荷加gin。」
唔好問我點解識，平時酒樓聽得啲伯父吹水多，我連東莞以前ISO服務有幾正，838disco有幾high都略知一二，連帶埋佢哋啲仔女讀咗乜屎片返嚟…
A：「咦，你都有啲料到喎，要等等呀下…」
Q’：「嗯，乜得gold label咋…」
A：「無辦法啦，要服侍啲細，唔想嘥酒。」
Q’：「咁整兩杯highball畀我啦。」
A：「你哋都幾悶下㗎喎。」




Q’：「無你咁多花臣啫。」
A：「好，坐低等一陣就有。」
「團長，我想要一杯Magarita。」係一個好斯文嘅女仔，應該係升中三？望真啲都幾鬼靚女下，令我諗返起初初識QQ長頭髮嗰陣…
A：「媽…媽…媽加litre？你媽咪俾唔俾妳飲㗎？」
「乜喎，我媽咪係Sommelière嚟㗎！」
（喵按：品酒師嘅法文讀法）
A：「索…索馬利亞人！唔得喇，即刻沖畀妳！」
佢啲誇張失實嘅表情好鬼正，我極度懷疑佢喺學校有玩埋drama甚至直頭opera。
然後我望住佢好pro咁切青檸同搾汁，再加入大量嘅雪碧同梳打。
「你嗰幾滴tequila係乜嘢意思呀！」




A：「意思係妳無男朋友保護，我唔可以害妳。」
「喂呀！」妹妹仔面都紅埋。