我怎可能是女神👸🏻獵人🏹（第一季更新至斷更為止）: 855

丁：「唔好躁，想惜咋，我又惜返妳先。」
絲：「走開呀！為咗你條粉腸，我專登棄清一色扣住你隻白板，如果公主碰咗牌，你手上隻牌咪我㗎囉，自摸混一色正花五番咋嘛！」
睇嚟我截咗佢隻單吊白好火咁喎，但怪公主都無用㗎，佢而家輸得更加甘都係受害者。
絲：「最衰都係你呀！旁觀者（齒宜）牙鬆螯！」感覺佢就嚟想跳過去嚟個飛身撲殺。
C：「我點知隻白板喺邊喎，姐姐。」
Q’：「哎唷，玩咋嘛，有乜好嘈喎，幾番啫？」
我：「自摸一番，小三元五番，混對六番，總數十二番…即係…」打機邊使人手計㗎…
Y：「位位二零四八，多謝晒！」論數學高低…
P：「咪住先，小三元係咪真係計五番㗎？」
我：「平時睇開啲大人打，記得係五番。」




當然死都唔可以俾人知我係一路執枱一路睇啲師奶呀叔喺度打牌。
Y：「我都唔肯定，上網查咪知囉。」
G：「我睇緊喇，清章番表寫五番，但亦有人話香港牌計四番五番都有，而台灣日本就肯定四番。」
C：「咁好似計四番多啲喎，四番啦。」
我：「但明明YY一開始話打清章，點解唔跟清章個表先？」大佬，差成千點都要爭取下呀？
呢個時候奧丁走過嚟搭我膊頭。
丁：「Xavier，冷靜啲，而家另外嗰三條女都揦住二千幾蚊，你收完二零四八都未有人要裸泳，如果你話一炮打沉三個就話啫，而家環境只會好快跟住輸一個落海，咁你不如慢慢搣，之後幾圈都有女畀你玩喎，睇個勢你都帶到尾㗎啦。」
我望一望YY，表示我都唔知點算好。
Y：「呢啲嘢老公話事啦。」拜託，我養妳唔起。
我：「咁就當十一番，每位一零二四，多謝晒。」




雖然已經收少咗一半，但Charles同公主繼續揦口揦面，蜜絲仍然激氣…而我哋team就有成四千五蚊。
我：「咁我而家不如畀返妳打。」
Y：「你咁旺，打多幾鋪先啦。」
領先住咁多，又真係好輕鬆嘅，鋪鋪扣牌都好難輸返落去，而我只需要等佢哋私片。
絲：「多謝Queenie！六番六十四！」
Q’：「自摸四番…位位八蚊。」
P：「多謝Queenie！五番三十二！」
如是者，西圈就咁樣完結咗，睇排名Queenie跌咗落第尾，嗯…有啲平嘅姐姐；其實又唔可以話無，同而家嘅細蚊差唔多啦，要怪就怪其他妹唔知食乜大。
Q’：「唔使客氣，抽返張啦。」
我：「多謝Queenie姐姐。」




Y：「唔使望住我，慢慢玩，懶得理你。」
嘩，明明係假情侶嚟，呷醋個樣都呷得咁真嘅，我頭先睇住妳俾人揸波嘅反應係咪太過含蓄？好在聽咗奧丁講，我而家真係可以慢慢玩女。
跟手我抽咗張紙仔交畀Queenie。