我怎可能是女神👸🏻獵人🏹（第一季更新至斷更為止）: 894

A：「實力…派…嗰兩姐妹除咗傻女之外都無乜值得聽㗎喇，因為佢兩個真係夠晒傻，聽得多會影響腦部發育。」
「死人團長你講乜呀？！」
A：「欸…我相信，你哋未出世就聽緊莫札特㗎喇，如果唔係點會咁不幸而家出現喺呢度…Charles，嚟啦，攞枝piccolo出嚟，你份譜喺呢度。」佢遞咗部iPad畀佢。
C：「吓…吓…呢首乜鬼嚟㗎？」
A：「簡單啦，對你嚟講，有無睇過eva呀？」
C：「呀…有，呢首即係…即係…」
A：「我想聽你女朋友唱歌，好好配合下佢啦。」
P：「我知道係乜，無問題。」
音樂響起，原來係eva嘅一首插曲，完全唔知叫乜名，但應該只要睇過套卡通嘅都會聽過。
P：「子供のとき，夢見たこと；今も同じ，夢に見ている；この大空に，翼をひろげ；飛んで行きたいよ；悲しみのない，自由な空へ，翼はためかせ…」




講真呢，eva呢套卡通對我哋嚟講咪就係睇機械人加埋碇真嗣同幾個女仔玩，背後嗰啲乜意義睇到我哋一嚿雲，總之就係世界點都要玩完，乜人都死晒，不過又雖死猶生咁…但呢首插曲真係好好聽，旋律非常優美，彷彿可以聽得出全人類對未來嘅願景咁；公主嘅聲線溫柔甜美而實在，如果我唔係有QQ呢個夢中情人，而又真係一個敗家仔，我真係會心動去打劫走人哋條女…平心而論，Charles嘅短笛亦吹得唔錯，音符清脆悅耳聽落好舒服，估計佢同公主最夾係呢個moment㗎喇，相信佢唔會將枝笛塞入去啲謎之洞穴入面。
喺醉人嘅音樂下，架船亦都好快去到西貢碼頭。
一落船梗係有家長嚟接仔啦，而且有三架車添，略過。
奧丁兩公婆即刻衝咗上的士，話約咗人去gym room喎，我除咗一句黐線外都畀唔到其他反應。
Charles央求公主陪佢再喺西貢行下，又用滿記糖水總店嚟誘惑佢，而公主堅持要返屋企交人，有趣。
Y：「咁我同Xavier都走先喇。」
Q’：「Xavier唔好掛住我呀！返去記得同YY跪玻璃，千祈唔好鬧架呀！」而Gabriel就寛容咁對我揮手再會。
團長好cool，郁一郁個眼眉就當講咗bye bye；Helen就用非常溫暖嘅笑容歡送我哋，目送我拖住YY行去的士站。
呢一日嘅男朋友cosplay job亦都嚟到尾聲。