雖然佢係好黐線,但我認為係七情上面咁飾演嘅居多,比起亞緹蜜絲佢好似少咗啲骨子裡嘅氣焰,嚟到而家呢個環境佢嘅底牌都差唔多已經出晒。
我:「係囉,無理由作為妳男朋友連妳濕唔濕,厚定薄,係咪粉紅都唔知㗎,點呀,覺得尷尬未呀?」
佢換返一個冷靜嘅眼神,深呼吸咗一口氣。
Y:「放心,OK粉紅嘅…我而家唔得閒炮製你住,不過我希望你識點做返一個惜我嘅男朋友。」
又嚟港女絕招,好似唔控制埋你思想都唔安樂嗰隻。
我:「嗯,啲嘢食嚟喇,我哋食嘢先啦。」
我夾咗一塊鮑片入口(口趙),然後細心咁幫嚿牛肋肉起骨分屍,切開一塊塊放落YY隻碗度,而佢都食得好開心。以前覺得韓國人鍾意食清湯牛肉好奇怪,白晒晒一定好淡茂茂,原來單純咁品嚐牛嘅清香都唔錯,加埋我諗係本身啲牛肉靚啦,呢道菜食得好舒服。
講返同女仔相處,我自問有排未去到登峰造極嘅境界,剩係睇個牌面都知無可能啦。或者因為細細個就成日有機會同女仔玩,或者我唔太care人哋點睇我,或者我早就唔在意自己重有乜可以輸,所以一般嚟講我唔會太驚青;但另一方面我就會好亂嚟同求祈,衰啲講句無乜做唔出,當細蚊係放置肉便器都重可以心安理得…不過呢個情況已經慢慢唔同咗。
對住黐線嘅YY,今日嘅關係係假嘅,我對佢興趣亦不大,而且在公在私我都唔應該打QQ朋友嘅主意,但單論玩我絕對可以放手一搏,喺情感上我邊有怕佢嘅可能。假如換轉係Wendy就會有啲頭痛,我要care佢嘅感受,亦唔希望會傷害到一個乜都未經歷過嘅女仔;又或者對住QQ我都覺得綁手綁腳,話就話同佢嘅相處已經近乎水乳交融,但心裡面其實好清楚有好多嘢係唔講得同唔做得。
Y:「死人頭畀隻耳仔嚟吖。」


吓,就算我衰都唔使扭我耳仔呀?玩下啫,呢度咁多人…
哦,原來佢係要將個ear pod塞入我隻耳仔度…隨即傳來一陣陣弦樂聲,啲音樂嘅錄音質素麻麻地,亦都顯得好單薄,絕對唔係攞嚟賣嘅商業作品。
我:「係妳拉嘅?」我得出呢個結論。
Y:「嗯,係我平時練習嘅錄音嚟,希望你鍾意聽。」
我:「當然鍾意,係我女朋友嘅音樂嚟喎。」
Y:「比起QQ嘅琴聲呢?定係你無聽過佢彈琴?」
已有 0 人追稿