我怎可能是女神👸🏻獵人🏹（第一季更新至斷更為止）: 925

Q：「係呀，咁咪幾好，病向淺中醫呀。」
我：「啱嘅，買書係要使下錢，我諗佢受過妳教訓之後已經痛定思痛，唔會做迷戀女神嘅低B仔㗎喇。」
Q：「希望啦，我都唔想對住啲低B仔，交叉仔，麻煩攞你隻右手出嚟吖。」吓！吓？QQ妳到底想點？
於是我就攤開手掌向天，手背向地，顫顫驚驚咁遞咗隻手板喺佢面前。（喵按：叉仔眼中戰戰兢兢等於戰戰『克』『克』）
Q：「呢啲乜嚟㗎！」一捉，一反，無所遁形。
我：「無…啲人仔，比較野蠻…有啲麻煩…」
Q：「乜人仔呀？你唔係想同我講踢波啲仔仔攪到你咁呀？無錢買脆香雞翼餓得滯？」
我：「唔會…當然唔係啦。」我已經滴緊冷汗。
Q：「係男仔定女仔攪出嚟？唔準講大話。」
我：「啲波友…有啲女仔friend，一齊去食嘢，成大班人玩下game…我唔肯認輸，佢哋發脾氣，無端端…就咁，不過無特別㗎，我都無諗住理佢哋。」




Q：「乜而家啲女仔咁黐線㗎咩？無端端咬人都有。」
我：「係囉，佢哋攞埋啲汽水酒上M記飲，搞到癲咗。」
Q：「咁你唔會推開人，叫停佢哋㗎咩，點會由得佢。」
我：「咁我男仔嚟，又唔係熟，推開人哋好似唔係幾好嘅…妳知我啦，又唔怕痛嘅，以為女仔有幾大力喎。」
Q：「陰功豬，實痛死咯。」佢好溫柔咁呵護我手臂。
我：「又未至於，散咗喇…係得返個印，樣衰啲啫。」
Q：「話唔定係人哋對你有興趣，你不解風情，激親人哋所以報復返你啫，係咪？」
我：「話唔埋嘅…不過都唔會再見得返，算啦。」
Q：「或者可以試下晚晚去修頓球場撞下，可能係你嘅下一個Carmen或者Mandy呢？」
我：「算數啦，咬到我咁嘅女仔，先無興趣。」




Q：「嘻，扮嘢，明明自己就好受歡迎，成日有女送上門，如果唔係應承咗媽咪，睇怕已經攪埋。」睇嚟佢唔係太嬲，好似重講得笑咁。
我：「都有可能，放心，我會乖乖地。」
Q：「乜人哋未夠十六歲咩，高中生喎？」
我：「唔係太清楚，我其實無研究…Hi bye friend啫。」
Q：「咁健仔識唔識到女？有無女仔咬佢呀？」
我：「佢…咪繼續傻仔咁，靜靜地坐喺度唔多講嘢。」
Q：「你都唔幫下好朋友嘅，遞佢隻手畀啲女咬下嘛。」
我：「我為佢好咋，佢玩唔嚟，唔想佢受傷，再次係人生留下女仔嘅陰影，等佢睇晒堆書先再算啦。」
Q：「我今朝十一點出門口喎，你估下我撞到邊個？」
我：「係？撞到邊個呀？」