Y:「我都想出手好耐,俾妳搶咗。」
Q:「咁大個漏洞,好難唔打佢喎。」
Z:「Queenie妳真係好狠,我就做唔出…」
最後,因為QQ嘅原因,反方喺投票評分之中大敗…
隔籬呢幾個女仔,實在係唔得罪得,否則性命堪虞。
辯論完之後,有中四同學嘅drama,故事圍繞住友情煩惱同學業壓力,都係嗰啲嘢啦,唔使指擬會有乜愛情環節…呢啲嘢我現實生活已經有充足提供,使鬼睇咩,我嘅著眼點只係台上面嗰兩個女仔隻腳,而且重要無著鞋。
我…到底幾時先走得?一陣又有讀者鬧我點算…
呢個時候,又有一個女仔赤腳走咗上台,不過唔係著住戲服,而係全白色嘅武術服裝,佢正正就係Uranus。
果然,妳哋嘅生活多姿多彩,就算唔玩音樂都大把嘢玩。
一身白色嘅衣服,啡色腰帶,應該唔太渣?根據淺色例如白黃綠就係初級嘅常識,然而我都唔識分佢係跆拳道,空手道,柔道定係合氣道…


我從來唔會睇唔起任何武術,因為當中含有大量技術,對體能亦有各種要求;但打架嚟講真係無乜用,現實上嘅武力就係靠大蝦細,邊個大份大力就有著數,再加埋暗箭傷人攻其不備,腿踢下陰手插眼,唔夠打就三十六著,再唔係就擸架撐,幾可要企到正一正面對面打,唔好同我講有技術就可以以弱勝強,唔通小學生可以打贏地盤佬咩,咁武術比試都唔使分重量級啦。
最大問題…武術講個樣同攞分,而真打會傷同痛,就好似我隻可憐嘅右手咁…你唔夠狠,痛嘅就係你。
Uranus先係立正,同觀眾鞠躬,再扎好過馬,屏息凝神五秒左右,大喝一聲繼而出拳,咁…即係空手道?係乜都好啦,反正靚女就好睇,好彩QQ無一齊去學,如果唔係我就更加堪憂;佢嘅拳腳睇得出係扎實嘅,速度快而準,打中應該會幾痛,前提係要打得中亦有空間畀佢用勁。
短短分零鐘打完套拳,係值回票價嘅,我斜眼望下三位女神都睇得津津有味,喺呢方面佢哋唔係競爭對手當然可以用一個好好嘅心態欣賞,如果唔係又…
原來未完,另一個黑帶男仔出場,又係師兄嚟,妳哋班女神真係識食…師兄開始打套拳,我當然無乜興趣。
我:「估唔到Uranus都會有男partner喎。」
Q:「唔可以咁講,佢哋唔係一齊學,只係知道對方嘅存在,學校搵到咪合作演出,無你想象中嘅環節。」
我都唔使想象妳去套弄人哋枝色士風,反正妳同條仔已經玩到無日無之,睇唔化嘅話我可以吐血身亡。
已有 0 人追稿