我怎可能是女神👸🏻獵人🏹（第一季更新至斷更為止）: 942

其實，樂觀啲諗，我真係好想話輕取一比零完場，下刪一千字就算；踢波咁複雜，睇過足球小將嘅你哋一定知道，每場比賽最少都要畫廿二個人，諗廿二個人名，作十招八招呃小朋友嘅招式，又唔可以剩係俾三四個人踢晒粒波咁唔真實，隨時畫下畫下有啲二打六變埋樣自己都唔記得，再加上粒波來來去去唔係前後飛就係左右飛，都唔明高橋陽一先生點解可以畫到過百本出嚟，然而全世界人最關心嘅係三杉淳重在唔在生…幾十年前就話科技落後要靠收音機嚟聽波聽馬，家陣重喺文字上面睇足球賽事同音樂描述，你話呢啲人唔係傻仔係乜？
不過呢，現實係呢場波一啲都唔好踢，綠社唔知係咪因為有Bubble同三個倒戈靚女喺度，佢哋顯得非常之硬淨，中場纏鬥得好激烈，尤其係瘟神經常俾一兩個人針對住，扭來扭去都出唔到波畀射手，有時迫於無奈重要回傳返嚟後面，不過都要提下我哋嘅社長腳法係幾好，唔會亂咁交失咗粒波，要接佢波通常跑幾步就搞掂。幸運嘅係綠社有一個主力前鋒已經飛咗攻擊力大打折扣，我同右衛撩下撩下通常就可以化解到危機；阿健就不停喺我嘅左線製造攻勢，由於我哋個左衛褪咗上去幫瘟神做三角前傳，所以每次阿健一突破落嚟就係由我招呼佢，同佢踢過咁多次波我點會唔知佢想點，只要我體能喺佢之上就唔會俾佢走甩，你咪扭囉，嘥完多啲力咪一樣俾我追返，你腳法又唔係好到可以當身邊嘅我係傻仔咁舞，玩多陣唔係俾我大腳解圍就係瘟神返嚟控返個場。
就係咁，上半場兩邊互交白卷，當然我最擔心唔係比數。
我即刻氣來氣喘咁跑去場邊搵返個老細，而佢同我一樣上氣唔接下氣：「呼…呵，使唔使咁急呀…」
我：「時間無多，畀我睇下你影到啲乜。」
德：「盡咗力，有五張，呢兩張最好。」
佢咁講得我當然信晒佢，一張係瘟神開角球隻腳啱啱掂完波重見到個波嘅殘影，而另一張就係高空頂頭鎚爭波，雖然瘟神唔係話高但彈跳力異常好搶贏咗呢球，重影埋對手飲恨嘅膊頭嘅一角；最過份嘅係，衰佬吖，用即影即有都可以影到上報紙咁嘅質素，呢個真係神人嚟，比在場上所有踢緊波嘅人都重要神，明明個個三腳貓功夫都可以影到世界杯咁嘅姿勢，相信豬扒都可以俾佢影到變刁蟬。
正所謂打完和尚唔要齋，我攞住啲戰利品就掉低咗佢。
德：「契弟！攞返你部機走呀！」
我：「Keep住先啦，咪又係學校嘅。」




我行返入人群向瘟神打咗個眼色，佢即刻醒水捉埋我去一二邊啲位度，旁人睇落應該似係教訓隊員？