我怎可能是女神👸🏻獵人🏹（第一季更新至斷更為止）: 949

乜話？！學校對面酒樓！？咪！咪即係我公司？屌！我今晚重要返工，又無理由請假然後去食飯咁樣衰㗎；唔係，諗諗先，定啲嚟，七點開飯，九點都完喇掛？應該唔會影響我開工嘅…
「咁我哋幾個女仔行陣街先，然後上去度住菜單等你哋啦。」QQ自然黐住兩位師姐。
咁，我收工喇…正當我想上去搵返阿康肥豬佢哋，有一位女仔截停咗我。
W：「睇嚟係我啲曲奇建功喎，果然有波入。」
我：「邊有得咁計㗎…十二碼啫，個個都有得入…」
我望一望看台，阿康佢哋同我打咗個眼色表示識趣走人…係嘅，我而家咁樣…阿健就陪住啲隊員同Bubble，睇完波嘅佢哋的確再無留喺度嘅理由。
喂，你哋可以同埋Wendy一齊落嚟搵我嘅啫…
W：「點得，全靠你呢一球先有得贏㗎！」
其實佢無講錯，每一個人，企每個位，跑得幾快，都係影響咗成場比賽，只不過咁啱用我呢一腳結束整場賽事。
我：「妳點話點好啦，妳又唔識踢波嘅。」




W：「係呀，但望住你踢波會覺得好得意，睇到個人好開心。」係咩，其實我都無做啲乜，但QQ都咁講過。
W：「咁，不如一齊行返去？」
我：「好呀。」呢個係我唯一可以答嘅答案。
呢三四個月，同佢食過好幾餐飯，時不時放完學就一齊溫埋書先返屋企，行喺隔籬嘅機會都唔少，如無意外，今次好有可能係我哋兩個最後一次肩並肩咁行；雖然我成身臭汗，但係佢都重係企到埋一埋，時不時手踭都會互相碰到…雖然一路上佢都無特別講啲乜，都係讚頭先龍門好勁擋到阿健嗰球，話我再跑快啲就可以一早倒掛返阿健入嗰球，同埋今朝焗曲奇好多種味好驚撈亂啲料。
我笑住同佢講，其實妳全部味撈埋晒我都係一樣咁食，然後俾佢打咗一下膊頭。
Wendy，妳講嘅每一粒字我都有聽清聽楚…但係，妳諗緊乜我就未必可以估到；但就算我知道咗又可以點，我無嘢可以做到。
過咗十五分鐘，我又送到佢去屋企樓下。
平時都係輕鬆揮下手，講聲bye bye，送佢入去。
不過今日佢無諗住即刻入去，重係對住我微笑。
W：「睇嚟…你都係唔會對我有特別嘅感覺㗎啦…」




千祈唔好睇少任何女人，佢哋永遠都可以喺禁區外放一枝冷箭射穿你嘅龍門；Sorry…場波已經踢完，我應該要認真啲。然而，我望住佢個樣hang晒機唔知點答佢。
你問我有無感覺，點都有少少，但我而家身世…
我：「Wendy…我…其實…唔係…對唔…」佢揞實咗我把口…
W：「唔準講落去呀！我想開開心心過埋呢一日！」