我怎可能是女神👸🏻獵人🏹（第一季更新至斷更為止）: 963

正如我都越嚟越明白QQ，知道佢嘅生活係點；或者佢對我有好感，甚至乎鍾意我，但要佢拋開一切去選擇我，將會係一個好艱難嘅決定，就算我係佢都諗唔到有乜理由要認定自己為終生伴侶。如果有一日QQ要拒絕我，但願我可以承受到，最重要係…右女神搵到真正屬於佢嘅幸福。
我望望部電話，原來已經七點三，差唔多夠鐘開飯無時間再畀我去沉溺同韻婷兩個人嘅關係，反正係我選擇放棄…到底呢兩日我發生咗乜事？人哋喺小說入面輪迴咗同一日十次八次先係一本七萬字嘅小說，點解我會好似離開唔到呢兩日咁嘅？不過講真又好充實，感受好深。
我急步咁行返公司，路上嘅景色匆匆掠過，都只會係同平時一撚樣嘅色彩，唯一唔同嘅係我內在嘅思緒。
瘟：「喂！咁遲呀，大忙人，最後一個到要埋單喎！」
我：「親愛嘅社長，唔好玩我啦…」今勻真係戙喺度。
瘟：「講笑咋，你好朋友已經幫你霸咗個位。」
Q：「唔關我事，只係咁啱無人坐喺度…」
我心諗，在場傻嘅都知瘟神對你有意思，唔敢坐妳隔籬好正常呀？既然無人咁斗膽我就唯有老實不客氣啦，我望望個環境，開咗兩張枱，當然就唔係大陣仗到結婚主家席嗰種，只係八至十人枱啫；隔籬嗰張就係中五嘅隊員，同埋中四但同瘟神唔同科嗰啲，重有兩個認得係陸運會掃金牌嘅健將，一共九個人喺度打緊啤啤；出到嚟玩衣著就梗係同平時有啲唔同，Stussy潮T，扮大人格仔恤，落場版日本足球隊波衫，鬼滅痛T…anyway都係咁啦。
而我呢邊主要都係幹事，逆時針QQ，文書，財政，瘟神，副主席，左衛，再加兩男一女打雜幹事同我；相信可以為我公司帶嚟一定嘅收益，即係四千？唔知佢會唔會收返自己打本嗰兩千蚊呢？
瘟：「好，人齊我就去叫廚房上菜先。」




我：「吓，你哋唔係真係為咗等我呀…」
Q：「點敢唔等你呀，贏波功臣。」
我：「邊有啲咁嘅事，我都係落場玩下啫。」
Q：「當你成功詛咒咗阿健囉，咁都可以俾人救到。」
我：「妳叫佢哋開飯先，打個電話同我講咪得。」
Q：「嘩，打電話打攪你雅興？呢個罪名我可擔當唔起呀！」的確，臨走前佢實見到韻婷搵我。
我：「唔關事嘅，沖涼…用咗太多時間啫。」
Q：「啱呀，劇烈運動完，成身都係體液，就梗係要洗耐啲白白啦。」QQ真係文學家嚟，可以用咁淺白嘅中文字形容到成件事充滿喵脷。（編按：京話貓膩，書面語內情，四字詞事有蹺蹊QK/蹊蹺KQ，古語兼粵語輘輷。）
我：「點會喎，我諗妳實在係諗多咗…」
Q：「吓，有乜可能，踢完波成身汗，當然要洗好耐白白啦。」對住佢我係無贏嘅可能性。




我：「我知錯喇，返去再同你講。」
Q：「專心開飯啦，我同你唔係好熟㗎咋。」