我怎可能是女神👸🏻獵人🏹（第一季更新至斷更為止）: 976

終於，所有嘢都完結，除咗死人爽講過嘅嘢…但係我又唔覺得有乜特別，反而阿健似係想避開我咁。
我：「我哋好似順路？不如一齊行？」真心我唔知道有乜安排，但既然應承得阿爽，叫做做返次主動咁大把啦…
健：「嗯，好呀…社長。」
行下行下，就剩返我同佢兩個，但係…成分鐘我哋都無出過聲，好似有啲尷尬…點算？Bubble呀，妳點可以驚呢啲嘢㗎，妳係堂堂嘅社長嚟…
我：「阿健，唔使唔開心喎，你今日踢得好好。」
健：「社長…對唔住。」
我：「傻嘅咩，做乜講對唔住。」
健：「嗯。」唉，救命，佢到底想點，我都理唔到咁多…
我：「我…到咗樓下喇。」
健：「咁…bye…欸…Bubble師姐…」




我：「係…點樣？」佢好似有嘢想同我講。
健：「Bubble師姐！難得妳嚟搵我打比賽，我實在好開心，可以為妳出戰…係我嘅光榮，但係我竟然…對唔住…一定係我諗住師姐對大波波好靚好想揸所以分咗心射到亂七八糟，好對唔住！係我錯！」
呢條友！到底知唔知自己講緊乜？阿爽你整件咁嘅嘢嚟整蠱我？！我真係寧願畀你玩餐飽…
※※※※※
執枱呀執枱！鋪枱布呀鋪枱布！點心紙呀點心紙！
來來去去都係做嗰幾樣嘢，無乜值得講；今日係星期五唔算太多客，最大嘅災場就係自己嗰兩張枱，清咗我成十幾分鐘，主因係食得太飽影響我做嘢嘅速度，不過好彩唔使十二點我就搞掂晒所有嘢。
而我亦都唔會做晒嘢就急急腳走嘅，我又唔使趕；有時我會攞枝玻璃刮喺收銀隔籬刮下魚缸玻璃，有時就攞疊點心紙出嚟切下疊下，陪多馬叔叔一陣先走。
馬：「算你啦，飲完啤酒都無打爛嘢。」
我：「哈…哈哈…一杯仔咁大把啫。」
馬：「你哋啲學生哥真係好嘢，計一圍都差唔多今個月最大張單…」佢mark緊數簿同鎖錢入夾萬。




我：「其實…我哋今晚食咗幾錢？」
馬：「兩圍夾埋六千幾，我已經無收加一㗎喇。」
嘩，即係瘟神唔止嘔晒有自己份嘅六千蚊出嚟，重有突添，唔通佢驚我笑佢收返自己嗰二千蚊孤寒？
我：「原來食咗咁多錢，真犀利。」
馬：「你嗰圍兩隻龍蝦，另外嗰圍三隻添，呢度已經千二三啦。」
我：「原來兩圍唔同㗎，乜真係咁擦得。」
馬：「都正常嘅，以前多大家庭食飯，圍圍枱都成十個人，來貨啲龍蝦會揀斤半到兩斤，呢個年頭就小家庭居多，有時一對情侶嚟食咁，入貨通常揀一斤就算，因為賣唔出會好大鑊，寧願平少少一次上兩隻。」