我怎可能是女神👸🏻獵人🏹（第一季更新至斷更為止）: K4

就係咁，我哋一齊返咗屋企，QQ當然唔會咁早返到嚟，而細蚊亦都乖乖喺度溫書，得我喺度就當然計數，一如QQ所講佢嘅學業係災難級，每一個chapter我剩係教佢做頭幾題已經要用好多時間，英文文字題就更加唔敢難為佢…以前都知佢讀書唔掂，但就從來無關心過亦無諗住幫佢，如果再唔理佢問題只會越滾越大。
我想質詢下大卡車，但其實佢都無叫我溫書，又點會花咁多時間勸細蚊，有啲嘢始終係靠自己。
溫到七點鐘我就入廚房煮嘢食，今次終於可以用晒啲青豆佢…冷飯，雜豆，雞蛋，腸仔粒，炒埋一鑊又一餐。
我：「將就食啦…酒樓有白飯攞，星期六日一都係食呢啲。」我將一碗噴緊煙嘅炒飯放喺佢面前。
蚊：「有你煮嘢畀我食開心死啦…粒腸仔好好味啊！」
我：「呢啲係Queenie指定雞肉腸嚟，如果我自己食通常用返廚師腸或者雞尾腸算。」
蚊：「睇嚟你真係好惜Queenie。」
我：「無呀…咁佢開聲講到，又唔係話貴好多嘅…所以而家咪煮畀妳食囉，妳鍾意就最好。」
蚊：「鍾意呀，食得出係幸福嘅味道！」佢個樣開心到吖，同佢出街食個樣都未有咁精靈。
食完飯，我攞啲碗碟入廚房，算啦，唔洗住。




細蚊就繼續計佢嘅數，我喺隔籬望住佢擔泥咁款。
突然之間佢擰乜身攬住我，將塊面埋喺我心口入面。
我：「唔使唔開心喎，慢慢嚟囉…有努力過就得。」
我明白佢，所以唔會同佢講總有一日會考第一呢啲廢話。
蚊：「唔關事，我只係好想攬住你…」
我：「細蚊…多謝妳，但我哋始終唔係好似以前咁。」我疊住佢膊頭，縱使畀唔到啲乜嘢佢都盡可能呵護返佢。
蚊：「點樣唔係好似以前咁？」
我：「我諗…已經唔再係男女朋友。」即使無正式分手。
蚊：「你如果唔鍾意咪㧬開我囉，又唔係未試過。」
我：「我…點會捨得，唔好諗啲唔開心嘅嘢啦。」




蚊：「我問你吖，你以前好鍾意我咩？」
我：「我…細蚊…係我以前對妳唔好。」
蚊：「係囉，你有鍾意過我咩？你係鍾意我可以暫時頂住師姐個位咋嘛，你鍾意有個女朋友喺自己身邊，你鍾意我嘅身體…雖然無乜波，你鍾意我畀到第一次你，鍾意我幾時都肯畀你用我嘅身體，鍾意發洩…唧啲嘢入我度，再望住我畀你用完個樣…」
我：「我…我知錯！細蚊，唔好！求下妳…」
蚊：「所以咪係囉！咁重講乜嘢以前啫，我唔要呀！」
我：「係，係…以前乜都唔係，但係而家…」
蚊：「其實你當我EX又好，當我朋友又好，契妹又好…可以惜我就夠㗎喇！你肯惜我…就算係乜都無所謂，我會好開心…我真係…好需要…嗚嗚嗚嗚！」跟住佢就喺我心口爆喊，估唔到Wendy無喊，喊嘅係…