【代糖故系列】《她被寄宿到屋邨男孩的家中》: K17

我夠想同女做運動，但再講我就會變成撩架打。
我：「明嘅，我精神上支持你，校隊就免喇。」
健：「放暑假喇，陪我玩下都得呀？！」風水輪流轉…
我：「可以嘅…但你有乜想玩，乒乓波？」
健：「可唔可以陽光啲，打波跑步咁？」我望住眼前嘅傻仔，佢好似真係迷迷地俾奧丁上身咁，但人哋就係堅嘅。
我：「而家十二點多啲，你想出去曬人乾？」
健：「呀，不如去游水咯，中二之後都未同你游過。」
我：「都可以嘅，雖然我而家飽到隻嘢咁，約幾點呀？」
健：「一點鐘開門，換完衫去到咪啱啱好，游到閂場咪最抵囉，係嘞，你重要上嚟攞埋堆數學書。」
呢條人仔，明顯係患上咗嗰啲乜開學症候群嘅朋友，話乜要減肥要溫書，肯定最後三分鐘熱度過一排就乜都唔記得晒，我就話迫住要搵錢養女人先咁神心啫。




健：「嗱！呢度六本數學書，攞住！」
我：「屌！咁重嘅，叫人點讀呀？」我即刻放返低。
佢屋企都係差唔多咁嘅款，咁啱佢阿媽唔喺度，非常好，唔使我同大人應酬，如果唔係又問我佢個仔教唔教得識我…我想講我而家已經有咗萬能補習飛釘Miss。
健：「貨就畀咗你嘞，唔該找數，齊頭四嚿水。」
我：「乜話？！而家啲書咁貴㗎咩？」
健：「夠用三年㗎喎…一本七十蚊，我已經講咗價平咗廿蚊，你就唔好咁多要求啦。」
我：「係嘅係嘅，原價幾錢一本㗎？」
健：「咪百四五咁樣囉，而家啲書係好貴。」
我：「OK…等等，早知頭先食雙拼算。」揞荷包攞錢…
健：「你…係咪好唔掂呀？養女神使好多錢？」




我：「咁又唔係…感嘆而家啲書鬼死咁貴啫。」
同埋啱啱又使咗成千落細蚊度，今勻真係要問老竇claim書簿費至得，如果唔係QQ實無啖好食。
找完數，阿健就入咗房換衫…由於我今日只係諗住攞張成績表返去所以孭住個好薄嘅側孭袋，塞咗兩本書入去就已經爆晒…
健：「搞掂，行得！」其實只係笠咗T恤短褲。
我：「使唔使咁熱血，趕住去投胎咩？」
健：「差唔多啦，搭車去到都點幾。」
我：「你…要跟住我返屋企呀？」佢出埋門口。
健：「由得你返去，肯定又拖我成粒鐘先肯落樓。」
算係講中咗嘅，我直頭想瞓個晏覺先添呀。
我：「咁幫手攞兩本先吖，好鬼重呀。」




健：「唔制，已經幫你運咗一轉，自己嘅嘢自己攞，你會唔會溝到女托我幫你摸下？」你個死人頭，唔係我花盡九牛二虎之力你以為社長會畀你…算，唔同你計。
其實都係三分鐘就已經返到屋企門口。
健：「係呢，Queenie喺唔喺入面㗎？」
我：「唔知喎，入到去咪知，你等我望望先。」
我唔知Queenie點諗，但如果佢換緊衫或者飛緊釘我係絕對唔會俾佢入嚟嘅，保護女神人人有責。