【代糖故系列】《她被寄宿到屋邨男孩的家中》: K44

健：「又唔係…」我望到佢個樣極之心緒不寧。
我：「你做乜喺度係咁㩒地圖，唔係唔識路呀？」
健：「我想睇下…最近嘅廁所要去到邊啫…」
我：「頭先士多對面咪有廁所囉，做乜唔去？」
健：「點知道你哋會喺山頂留咁耐喎。」
我：「同埋做乜要喺度搵廁所，你去到放煙花咁都唔會有人拉你㗎喎，俾我嘅話就實行射落懸崖，一定爽到爆，係驚唔小心連埋啲尿跌咗落去。」
健：「我先無你咁黐線呀，玩埋晒啲無聊嘢。」
我：「乜無聊呀，男仔係玩呢啲㗎啦，我以前試過喺九龍水塘條壩殊殊落去，直頭爽到疑是飛流落九天呀。」
Q：「係飛流直下三千尺，疑是銀河落九天呀！」
健：「你係咪傻㗎！屙落水塘自己會有份飲返㗎！」




我：「唓，你有份飲添呀！我唔屙都會有其他人屙㗎啦，我懷疑啲馬騮都會咁做，你知唔知泳池入面有幾多個小朋友會殊殊，你以後千祈唔好去游水呀！」
Q：「你唔係今日先第一日知道你好朋友有幾變態呀？」
健：「都知嘅…但都無理由喺妳面前講啲咁嘅嘢…」
Q：「我哋一齊住㗎，知道佢啲衰嘢可以等我安全啲…」
我：「無錯，靚女唔屙豬豬，可以用皮膚吸收返補水。」
當然，佢打我已經變成一個好熟手嘅行為。
健：「但亂咁去廁所…好似都唔係幾好。」
Q：「無辦法啫，忍到返落去你會爆㗎喎，除非你有公德心到用個膠樽載返帶走…」
我：「噢！So dirty！如果女神喺度急殊殊一定會大解放，最多做少廿一秒靚女。」
健：「但係又無得洗手…妳唔會嫌我變態㗎可？」




我：「你去到放煙花咁咪唔使用手，爆旋陀螺都重得…」
Q：「你水壼重有啲水？濕下咪洗咗囉。」
健：「如果係妳急嘅話…都會唔忍到去到廁所先？」係咪低B㗎佢，無端端問女仔啲咁嘅嘢，溝女又唔見你咁叻…
Q：「雖然我係靚女，不過都係要去廁所嘅，如果忍唔到就點都要去㗎啦，係咪想睇我野外小便？一萬蚊一次可以考慮下。」阿健聽到呆咗，我都差唔得幾多。
我：「哈哈…靚女都可以變態，唔怪之得我哋可以住埋一齊都相安無事…」又好似…現實確實就係咁。
Q：「去啦，太陽落山喇，我哋行先，殊完就追上嚟啦。」結果，太陽就喺我哋呢啲毫無營養嘅對話之下感到百般無奈再黯然咁日薄西山。
QQ帶頭繼續行，不過就行得好鬼快下。