【代糖故系列】《她被寄宿到屋邨男孩的家中》: K52

Q：「考完試…應該要等一兩日先知成績呀？」
蚊：「嗯，我有信心，應該無問題嘅…但就算我合唔合格都要多謝返妳嘅，始終麻煩咗妳咁多日。」
Q：「可以…嘅，咁我而家都好得閒，妳想玩啲乜？」
蚊：「就請妳食返餐飯…同埋…不如夜晚去游水？」
我唔知QQ點諗，但我聽到呆咗…至少我認識中嘅細蚊係唔多做運動嘅女仔，你話如果Uranus約佢成件事就正常好多，到底細蚊有乜打算？我唔係幾諗得通，想玩only？
阿健又無端端行山，呢排啲小朋友咁怪嘅…
Q：「天氣咁熱，應該…就無問題嘅，我聽日再答實妳吖。」係喎，QQ重M緊，聽日完未㗎。
完咗…就快要約男朋友，又可以開大餐，各取所需…
蚊：「嗯，不過我都只係可以請妳食普通嘢㗎咋…」
Q：「唔緊要，我要求好低，好味過呢條友煮嘅就得。」




我：「喂，咁講乜意思呀，我好歹都算正常…」
Q：「啱呀，你係正常，咁出街食就想好味過正常啲㗎啦，唔講住喇，我夠鐘出去，祝細蚊妳聽日好運。」
然後佢就出咗門口，得返我同細蚊你眼望我眼。
我：「攪乜鬼？細蚊妳識游水嘅咩？」
蚊：「唔識喎，做乜咁問？」
我：「咁妳又約人哋去游水？貪得意呀…」
蚊：「我為咗你咋！Queenie著泳衣個樣一定好正！」
我：「我邊使妳咁為我呀，妳點知人哋想唔想去？」
蚊：「啱啱人哋咪話咗OK囉，同埋上年你問過我去唔去游水我推咗你嘛，而家咪陪返你。」無端端講返上年暑假發生嘅事，好似已經過咗好耐咁，畢竟呢半年發生咗太多事，我生活上嘅轉變大到彷彿輪迴咗幾次咁。
蚊：「同埋睇你個款都唔敢約人哋游水㗎啦，而家有我幫你，可以欣賞下Queenie索到爆嘅身材。」




係嘅，的確…男仔約一個只係朋友關係嘅女仔去游水係好大件事，話晒去游水都係一個正常女仔露出最多肉嘅時候，玩過追女game都知，追女仔首先要約去商場，餐廳，水族館，遊樂場，滑雪溜冰，游水其實已經去到開房前嘅最後一處地方；除非，對男女真係好鍾意游水，一齊係校隊，甚至乎隨時去都會撞到面嗰隻。
而約女去游水，男仔不外乎係想昅嘢，繼而想試下條女係咪打算接受自己，再下一城毛手毛腳如果無乜反抗幾乎已經表示得米；嗰陣同細蚊扑到悶，咪想同佢去曬下命，刺激下其他死靚仔，同佢喺泳池恩恩愛愛，等人哋用沒鏡觀察下我哋下半身喺水底入面有幾咁氣氛高漲…
細蚊雖然知道QQ會喺我屋企飛釘俾我望，但佢應該估唔到QQ會成日著住底衫褲喺度換衫，更加唔會諗到其他更噴血嘅畫面…因為QQ有男朋友，而且頭先出門口前佢都係入廁所換衫。都好嘅，我又未同QQ游過水，咪游下囉，反而同佢好姐妹就游咗先…