【代糖故系列】《她被寄宿到屋邨男孩的家中》: K56

雖然呢，同成績一樣，佢就無得同QQ鬥㗎喇，但我都唔想佢太過寒酸，因為太大對比實會令佢唔開心。
蚊：「咁我靠晒你㗎喇，聽日見啦！」
我：「唔好剩係諗住去玩，聽日重要考數學㗎！」
蚊：「知道喇，bye bye你條尾！」
不如…索性叫QQ幫佢裝下身啦，上次買完出面嘅衫，其實入面嘅都要更新下㗎喇，話雖我唔想佢著畀其他仔睇。
我：「Queenie返嚟嗱…喂…做乜好似散晒咁嘅…」佢打開門，然後跌跌撞撞咁撻咗落我張床上面坐低。
Q：「嗯啊…你估應酬啲八婆唔攰㗎…」我最諗唔明嘅係，YY同Uranus我都理解到，但Zilvia同佢哋一齊會點？
我：「咁玩得開唔開心呀？同埋…又飲酒嚟呀？」
Q：「都開心嘅，Yvonne個衰女包囉，今次帶埋Whisky嚟添，我哋嗌咗好幾杯soda，mix落去就very good…」唉，YY姐姐嚟㗎，真係教壞晒妳哋。
我：「走私煙酒犯法㗎，今次又放落保溫瓶呀？」




Q：「唔係，係香水玻璃樽。」
我：「都黐鬼線，一陣有人以為妳哋玩到無嘢好玩攞香水嚟賭，實報警都似。」
Q：「如果飲咗香水，咁我咪呼出嚟嘅空氣都會香囉！」
我：「香水都係用酒精造，妳一樣會醉Q咗。」
Q：「我無醉呀！邊有咁易醉！」但係佢嘟嘴望住我。
都懶得理佢係真醉定假醉，見佢咁樣梗係嘴返啖先。
Q：「哈哈，傻仔嚟嘅，我無醉呀，唔準博懵！」佢兩隻手搣住我塊面啲肉然後喺度傻笑，到底…佢係喺度扮無醉定係喺度扮醉玩我…
我：「邊有…以為妳要咋嘛，飲咗好多咩？」
Q：「佢哋囉，話要灌醉我再審我，係咁斟落我個杯…」
我：「要審妳乜呀？妳搶咗YY條仔呀？」




Q：「我先唔要佢條仔呀！審我…點樣同條仔曳曳囉，有無背叛我條仔…係咪玩弄佢感情呢啲…」
我：「咁妳係咪認錯話以後唔敢喇？」
Q：「你都黐線嘅，我都無醉，點會答佢哋啲無中生有嘅嘢喎。」係咪無中生有要問你條仔先知喇。
我：「妳哋係咁講呢啲嘢，Zilvia唔會唔自在嘅咩？」
Q：「吓，佢好鍾意聽㗎喎，只要無仔喺度就得。」
八婆，成班都係恐怖嘅八婆嚟…
我：「食生日飯…有無禮物收㗎？」
Q：「欸…喺呢度呀，有個玻璃樽…」佢攞咗個好高貴嘅黑色盒出嚟打開，入面包得好靚，係一個精美嘅玻璃樽，金色蓋，入面載住一啲粉紅色嘅液體。
其實我知係香水嚟，唔係酒亦唔係洗手液…
晶瑩剔透嘅玻璃上面有金色嘅刻印，寫住Love by Kilian don’t be shy，講真吖，我對化學氣味係無乜興趣嘅，但個樽實在係靚得好交關，靚到斟啲水喉水落去都會覺得好飲嘅地步。生日…其實係一個燒錢嘅活動嚟，但QQ身為前富家女都無得避，所以我唔會怪佢。